Lenta.ru-ի փոխանցմամբ՝ Լրագրողների պաշտպանության կոմիտեն (Committee to protect journalists) ներկայացրել է աշխարհի տարբեր երկրներում լրագրողների կալանավորման վերաբերյալ իր հերթական զեկույցը։
Դրանում նշված է, որ ներկայիս դրությամբ համայն աշխարհում իրենց մասնագիտական գործունեության համար բանտերում են պահվում 179 լրագրողներ։ Կալանավորված լրագրողների ցուցանիշով առաջատարն Իրանն է՝ 42 լրագրող։ Վերջիններս վիճարկել էին 2009 թվականին Իրանում տեղի ունեցած նախագահական ընտրությունների արդյունքները, ինչի համար էլ հայտնվել էին ազատազրկման մեջ։
Առաջին տասնյակում ընդգրկվել են նաև Էրիթրեան՝ 28 լրագրող, Չինաստանը՝ 27 լրագրող, Մյանմարը՝ 12 լրագրող, Վիետնամը՝ 9 լրագրող, Թուրքիան ու Սիրիան՝ 8-ական լրագրող, Իսրայելը՝ 7 լրագրող։
Զեկույցում նշված է, որ նախորդ տարվա համեմատ 34-ով ավելացել է ձերբակալված թղթակիցների, խմբագիրների ու ֆոտոլրագրողների քանակը, ինչը պայմանավորված է Մերձավոր Արևելքում ու Հյուսիսային Աֆրիկայում տեղի ունեցած և ունեցող ժողովրդական հուզումների հետ։
Վերջին անգամ նմանատիպ բարձր ցուցանիշ գրանցվել է 1996 թվականին՝ 185 լրագրող։ Նշվում է, որ Լրագրողների պաշտպանության կոմիտեն իր ամենամյա զեկույցները սկսել է հրապարակել 1990 թվականից սկսած։
Հիշեցնենք, որ այս տարվա ապրիլի սկզբին Մամուլի միջազգային ինստիտուտը (IPI) հայտարարել էր, որ կալանավորված լրագրողների ցուցանիշով Թուրքիան աշխարհի բացարձակ առաջատարն է.
«Ներկայումս թուրքական բանտերում են գտնվում 57 լրագրողներ: Այդպիսի իրավիճակչկա աշխարհի որևէ այլ երկրում: Նախորդ տարվա դեկտեմբերի դրությամբ 1-ին տեղը միմյանց միջև էին կիսել Չինաստանն ու Իրանը`34-ական կալանավորված լրագրողներով»:
