ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ դեկտեմբերի 3-ին Նյու Յորքի «Կարնեգի» դահլիճում ՄԱԿ –ում ՀՀ մշտական ներկայացուցչության հովանավորությամբ և ՀԲԸՄ հետ համագործակցությամբ կազմակերպվել էր տարբեր երկրներից ժամանած տաղանդավոր երիտասարդ կատարողների համերգ` նվիրված Ֆրիտյոֆ Նանսենի 150-ամյակին:
Միջազգային բազմաթիվ մրցույթների դափնեկիր հայ երաժիշտների կատարմամբ «Կարնեգի հոլում» հնչել են Արամ Խաչատուրյանի, Էդվարդ Գրիգի, Առնո Բաբաջանյանի, Էդվարդ Միրզոյանի և այլ կոմպոզիտորների հանրահայտ ստեղծագործությունները:
Նանսենի հիշատակին նվիրված միջոցառմանն ելույթով հանդես է եկել ՄԱԿ-ում ՀՀ մշտական ներկայացուցիչ Կարեն Նազարյանը, ով իր խոսքում նշել է, որ Նյու Յորքում կազմակերպված համերգը նշանավորում է Նանսենի հանդեպ հայ ժողովրդի և նրա կառավարության տածած հարգանքն ու երախտագիտությունը:
Նազարյանն անդրադարձել է Նանսենի հայանպաստ գործունեությանն Ազգերի լիգայի փախստականների հարցերով գերագույն հանձնակատարի պաշտոնում` ուղղված ցեղասպանությունից փրկված հայ ժողովրդի բեկորների ներգաղթի, վերաբնակեցման ու վերապրելու համար պայմանների ապահովմանը:
«Կառնեգի հոլում» կայացած համերգին ներկա էին Ամերիկայի Արևելյան ափի հայ համայնքի, համայնքային կառույցների, ինչպես նաև Նյու Յորքում տեղակայված մի շարք դիվանագիտական առաքելությունների ներկայացուցիչները:
