ВКонтакте սոցցանցի հիմնադիր Պավել Դուրովը պատմել է, որ ճնշումների է ենթարկվում Դաշնային անվտանգության ծառայության կողմից: Ինչպես հաղորդում է lenta.ru-ն, Դուրովի հետ իր նամակագրությունը իր բլոգում հրապարակել է edvvvard օգտատերը, որը սոցցանցում բացված « -РосПил – война коррупции – Алексей Навальный- » խմբի ադմինիստրատորն է:
Օգտատերը պատմել է, որ դեկտեմբերի 6-ի երեկոյան խմբում հնարավոր չի եղել նոր թեմաներ ավելացնել և մեկնաբանություններ թողնել: Այդ մասին նա գրել է Twitter-ում, որին Դուրովը պատասխանել է. «Խումբը գերազանցել է օրական 16,384 գրառում կատարելու սահմանը: Այժմ մենք փոխում ենք ալգորիթմերը ձեր օգտին»: Արդյունքում հրապարակումների առավելագույն չափը բարձրացվել է մինչև 64 հազար:
Դրանից հետո անձնական նամակագրություն է տեղի ունեցել խմբի ադմինիստրատորի և Դուրովի միջև, որի ժամանակ Դուրովը խոստովանել է, որ վերջին օրերին Դաշնային անվտանգության ծառայությունները խնդրում են իրեն արգելափակել ընդդիմադիր խմբերը, սակայն իրենք սկզբունքորեն դա չեն անում: «Չգիտեմ՝ ինչով դա կարող է ավարտվել մեզ համար, բայց մենք դիմանում ենք»,- ասել է նա:
Ալեքսանդր Նավալնիի խմբում գրանցված էշուրջ 80 հազար մարդ: Դրանում, մասնավորապես, քննարկվում են նրա ձերբակալության և 15-օրյա կալանքի հետ կապված թեմաներ, ինչպես նաև դեկտեմբերի 10-ին նախատեսվող ցույցի վերաբերյալ հարցեր :
Քիչ առաջ հայտնի դարձավ, որ ՌԴ ՆԳՆ Հատուկ տեխնիկական միջոցառումների բյուրոյի ղեկավար Ալեքսեյ Մոշկովն առաջարկել էր զրկել համացանցի օգտատերերին գաղտնի մնալու իրավունքից: «Գրանցվի՛ր իսկական անունով, հայտնի՛ր իրական հասցեդ և շփվի՛ր»,- հայտարարել է նա Российская газета թերթին տված հարցազրույցում:
