ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ Հայաստանի արտգործնախարարությունը, Եվրահանձնաժողովը և Միգրացիայի միջազգային կազմակերպությունն (ՄՄԿ) այսօր` դեկտեմբերի 7-ին, կազմակերպել էին բարձր մակարդակի համաժողով` նվիրված ԵՄ-ի հետ Շարժունակության գործընկերությանը:
Համաժողովի նպատակն էր քննարկել Արևելյան հարևան երկրների հետ նման գործընկերությունների իրականացումը և 2011թ. հոկտեմբերին ստորագրված Հայաստան-ԵՄ Շարժունակության շուրջ գործընկերության մեկնարկը:
Միջոցառմանը Հայաստանի պետական մարմինների և քաղաքացիական հասարակության ներկայացուցիչների հետ Եվրահանձնաժողովի և ՄՄԿ փորձագետները քննարկել են Շարժունակության շուրջ գործընկերության իրականացման ընթացակարգերը:
Մոլդովայի և Վրաստանի ներկայացուցիչները ներկայացրել են նմանատիպ գործընկերությունների իրականացման փորձը համապատասխան երկրներում:
Համաժողովում բացման խոսքով հանդես է եկել ՀՀ արտգործնախարարի տեղակալ Զոհրաբ Մնացականյանը, ով ընդգծել է, որ «Հայաստանը Շարժունակության շուրջ գործընկերությունը դիտարկում է նաև ավելի լայն` Եվրամիության հետ միջմարդկային շփումների դյուրացման և ակտիվացման, մեր երկրի զարգացման գործին այդ շփումների ուղղակի դրական ազդեցության համատեքստում»:
Անդրադառնալով ՀՀ-ԵՄ հարաբերություններում առկա բարձր դինամիկային` փոխնախարարը նշել է, որ այս խորհրդաժողովը լավ հնարավորություն է փորձի և տեղեկատվության փոխանակման միջոցով հստակ պատկերացում ձևավորելու, Շարժունակության շուրջ գործընկերության շրջանակներում թիրախային ծրագրեր և կոնկրետ նախաձեռնություններ իրականացնելու համար:
Հայաստան-ԵՄ Շարժունակության շուրջ գործընկերությունը ստորագրվել է 2011թ. հոկտեմբերի 27-ին Լյուքսեմբուրգում:
Դրա նպատակն է Հայաստանի և Եվրամիության միջև միգրացիոն հոսքերի կառավարումը, անօրինական միգրացիայի դեմ պայքարը, ԵՄ երկրներում ՀՀ քաղաքացիների օրինական մուտքը կանոնակարգելը, ուսանողական և մասնագիտական փոխանակումներին աջակցելը:
