ԲՀԿ նախագահ Գագիկ Ծառուկյանը համառորեն լռում է Կոնգրեսի առաջնորդ Լևոն Տեր-Պետրոսյանի հայտարարության մասով և չի անդրադառնում Հայաստանի հասարակական-քաղաքական միջավայրը բավական աշխուժացրած հայտարարությանը Կոնգրես-ԲՀԿ գործակցության մասին: Ծառուկյանի լռությունն արդեն այնքան երկարեց, որ թերևս կարելի է եզրակացնել, որ սա ինչ-որ տեղ նաև համաձայնություն ենթադրող լռություն է՝ լռություն, որը համաձայնության նշան է:
Բայց այդ պարագայում էլ տարօրինակ է ՀՀԿ, մասնավորապես Սերժ Սարգսյանի լռությունը: Չէ՞ որ եթե ԲՀԿ-ն արդեն լռում է որպես համաձայնության նշան կամ ինչ-որ տեղ` որպես համաձայնության նշան, ապա դա պետք է անհանգստացնի Սերժ Սարգսյանին: Սակայն բացառված չէ, որ Սարգսյանը երևի թե հենց դրան էլ սպասում է, այսինքն` սպասում է այն պահին, երբ Ծառուկյանը մի որևէ բացահայտ ռևերանս կանի Կոնգրեսի օգտին՝ «մեր ոչ միայն խոսքը, այլ նաև լռությունը գործ է» տարբերակով:
Ծառուկյանի այդ շարժը կարող է Սերժ Սարգսյանի համար դառնալ նրան պատժելու ծանրակշիռ պատճառ, որի դեմ Ծառուկյանը կարող է հակափաստարկ չունենալ: Բանն այն է, որ Հայաստանի իշխանական համակարգում փաստարկված պատիժը չափազանց կարևոր հանգամանք է: Համակարգը գործում է պայմանավորվածությունների և, այսպես ասած, քրեական հասկացությունների մեխանիզմով, դրանց շրջանակում: Հետևաբար քմահաճույքով պատիժը կամ ընդհանուրի համար չբացատրված պատիժը կարող է ցնցում առաջացնել համակարգում, քանդել առանցքը և համակարգի մոտ անվստահություն առաջացնել այդ մեխանիզմի երաշխավոր հանդիսացող նախագահի, տվյալ դեպքում` Սերժ Սարգսյանի մոտ:
Այդ իսկ պատճառով Սարգսյանին ըստ ամենայնի անհրաժեշտ է, որ նա Ծառուկյանին լրջորեն պատժելու ծանրակշիռ փաստարկ ունենա` այդ փաստարկը ներկայացնելով համակարգին և ցույց տալով, որ ինքն ամենևին էլ անհիմն, քմահաճ վերաբերմունքով կամ ինչ-որ գաղտնի նկատառումներով չէ, որ պատժում է իշխանական համակարգի հենասյուներից մեկը հանդիսացող օլիգարխ-կուսակցապետին:
Կոնգրեսի կողմն արվող ԲՀԿ բացահայտ ժեստը կարող է լինել հենց այդպիսի փաստարկ: Իսկ այդ տեսանկյունից «Բարգավաճ Հայաստան»-ն աքցանի մեջ է, որովհետև հավերժ լռել չի ստացվի. Կոնգրեսին ԲՀԿ-ի ոչ թե լռությունն է պետք, այլ գործը: Կուսակցությունը կամ պետք է դևալվացնի իր իսկ լռությունը, կամ էլ դրանից անցնի գործի: Իսկ այդ դեպքում արդեն գործի կանցնի Սերժ Սարգսյանը: Երևի թե հենց դրա համար էլ Սարգսյանը շարունակում է լուռ հետևել ԲՀԿ-Ծառուկյանի լռությանը: