Associated Press գործակալության փոխանցմամբ, ամերիկյան ցամաքային զորքերի փոխգնդապետ Թերրենս Լեյքինն ազատվել է զբաղեցրած պաշտոնից և դատապարտվել է 6 ամիս ազատազրկման, քանի որ հրաժարվել է կատարել այն հրամանը, որն, ըստ փոխգնդապետի, տվել է «ոչ լեգիտիմ» նախագահ Բարաք Օբաման:
Մեղադրական կողմը պահանջում էր զորացրել փոխգնդապետին և դատապարտել նրան երկու տարվա ազատազրկման: Մեղադրական կողմը սա բացատրել էր նրանով, որ Լեյքինը ոչ միայն չի կատարել հրամանը, այլև վերածել է այդ ամենը քաղաքական ֆարսի:
Իսկ փոխգնդապետի հետ միջադեպը տեղի էր ունեցել այս տարվա սկզբին, երբ նա հրաժարվել էր Աֆղանստան մեկնելուց ` բացատրելով դա նրանով, որ նախագահ Օբաման անօրինական քաղաքացի է, քանի որ ծնվել է ԱՄՆ տարածքից դուրս: Հետագայում փոխգնդապետը ճանաչել է իր մեղքը` խոստովանելով, որ դատավարության ընթացքում է շեշտը դրել նախագահի անօրինականության վրա, քանի որ հետևել է փաստաբանների խորհրդին, և որ բանակը լավագույն վայրը չէ` նախագահի լեգիտիմության հարցը բարձրացնելու համար:
