Business-Грузия-ի փոխանցմամբ՝ Վրաստանը շահագրգռված է Բուլղարիայի տարածքով իր էլեկտրաէներգիան դեպի Եվրոպա արտահանելու մեջ։ Այս մասին Սոֆիա կատարած այցից հետո լրագրողներին հայտարարել է Վրաստանի էկոնոմիկայի և կայուն զարգացման նախարար Վերա Կոբալիան։
Վերջինս նշել է. «Վրաստանն ընդլայնում է իր էներգետիկ հնարավորությունները, ընդ որում՝ արտադրում է էկոլոգիապես մաքուր էլեկտրաէներգիա հիդրոէլեկտրակայաններում, դրա համար էլ շահագրգռված է դրա արտահանմամբ։ Ատոմային էներգիայից հրաժարվելու հետ կապված՝ Եվրոպայում աճում է էկոլոգիապես մաքուր էլեկտրաէներգիայի պահանջարկը։
Մինչև 2015 թվականը Վրաստանը մտադիր է նոր հիդրոէլեկտրակայանների կառուցման շնորհիվ կրկնապատկել իր էներգետիկ հզորությունը։ Ընդհանուր առմամբ, առաջիկա տարիներին Վրաստանը ներկայումս կառուցվող հիդրոէլեկտրակայանների շնորհիվ կստանա հավելյալ 1500 մեգավատտ էլեկտրաէներգիա»։
Կոբալիան ընդգծել է, որ Բուլղարիան Վրաստանի խոշորագույն առևտրային գործընկերներից մեկն է, և որ այս տարվա առաջին 10 ամիսներին երկու երկրների ապրանքաշրջանառությունը կազմել է 279 միլիոն դոլար։
Հիշեցնենք, որ ներկայումս Վրաստանը Թուրքիայի տարածքով էլեկտրաէներգիա է մատակարարում Բալկաններին և մտադիր է Հայաստանի միջոցով էլեկտրաէներգիա մատակարարել Իրանին։
