Աբովյան 23 հասցեում գտնվող «Փարիզյան սուրճ» սրճարանը լեփ-լեցուն է, ինչպես երբեք: Ուրբաթ օրն առավոտյան ամեն ինչ արդեն պատրաստ էր, որպեսզի սրճարանն անցներ ձմեռային ռեժիմին: Սակայն քաղաքապետարանի ներկայացուցիչները եկան և տեղեկացրին, որ սրճարանի բացօթյա հատվածը պետք է ապամոնտաժվի: Սրճարանի մի մասն արդեն իսկ ապամոնտաժված է, սակայն մյուս մասը կշարունակի աշխատել, մինչ քաղաքապետը կընդունի սրճարանի սեփականատեր հիմնադիր Աշխեն Վալերի Գործունյանին:
«Առաջին լրատվական»-ի հետ զրույցում Վ. Գործունյանն ասաց, որ երեկ եղել է քաղաքապետարանում, փորձել հանդիպել քաղաքապետին, սակայն նրան խնդրել են գրություն թողնել`խոստանալով, որ քաղաքապետը կընդունի իրեն: Նա նաև հույս հայտնեց, որ քաղաքապետի հետ հնարավոր կլինի ընդհանուր տրամաբանական հայտարարի գալ, քանի որ «Փարիզյան սուրճը» Երևանում քիչ ճանապարհ չի անցել:
Վալերի Գործունյանը չգիտի` ծագած խնդիրը զուգադիպություն համարի՞, թե՞ ինչպես: «Միշտ ինձ հետ այսպիսի դեպքեր են պատահում: Ինչո՞ւ նորից «Փարիզյան սուրճը»: Երևի այն գրավում է իր կողմը»,- կատակեց սփյուռքահայ գործարարը`հավելելով, որ «Փարիզյան սուրճը» երևանցիների համար մի գողտրիկ, թեթև վայր է դարձել, որտեղ նրանք սուրճ են վայելում, հանգստանում: Ըստ նրա` սրճարանի առանձնահատկությունը հենց այն է, որ ձմեռային եղանակին նույնպես քաղաքացիները կարող են բացօթյա սրճարանում վայելել սուրճ, այլ ոչ ծանր կառույցի տակ: Վալերի Գործունյանի հավաստմամբ`Փարիզում այդպես է, և եթե դա անճաշակ են համարում, ուրեմն ամբողջ Փարիզն է անճաշակ և տգեղ:
«Փարիզյան սուրճը դրսի սրճարան է` ճիշտ Փարիզի նման: Այսինքն` մենք ստեղծել ենք այդ տեղը և դրսի սրճարանը, որը նաև ձմեռային է: Ես լսել եմ, որ քաղաքապետի մամլո խոսնակն ասել է, որ սրճարանը նման է ջերմոցի: Եթե «Փարիզյան սուրճ» սրճարանը նման է ջերմոցի, ուրեմն ես հարգում եմ բոլորի ճաշակը, բայց սրճարանն իմ ճաշակը չէ, այլ փարիզյան»,- մեկնաբանեց սփյուռքահայը` հավելելով, որ մինչև հիմա գիտեր, թե երևանցիները հավանում են սրճարանը, որովհետև այն թեթև է:
Անդրադառնալով քաղաքապետի պատասխանին`ասաց, որ ոչ մի պաշտոնական փաստաթուղթ չունի: «Եթե օրենք կա, ես դրա դեմ անզոր եմ, բայց ցանկանում եմ պարզել, թե դա ինչ որոշում է և ինչի հիման վրա»,- նշեց գործարարը`հավելելով, որ անհամբեր սպասելու է քաղաքապետի պատասխանին, քանի որ պատրաստվում է տոները դիմավորել ընտանիքի հետ Փարիզում:
Նշենք, որ սոցիալական ցանցերում ձևավորվել են հասարակական խմբեր`ի պաշտպանություն «Փարիզյան սուրճ» սրճարանի: Մի շարք քաղաքացիների համոզմամբ, սրճարանն արդեն Երևան քաղաքի մի մասն է կազմում: Արդեն 16 տարի է, ինչ «Փարիզյան սուրճ» սրճարանը Երևանի բնակիչներին և Հայաստանում Ֆրանսիայի համայնքի ներկայացուցիչներին տեղափոխում է Փարիզ: Այն հարազատ վայր է երևանցիների և Հայաստան ժամանող ֆրանսիացիների համար: Սրճարանի հիմնադրի փաստմամբ`16 տարիների ընթացքում պահպանվել է շրջակայքի մաքրությունը, գեղեցկությունը, քանի որ նա ինքը դեմ է կանաչ տարածքներումտաղավարներ կառուցելուն:
Սփյուռքահայ Աշխեն Վալերի Գործունյանն այժմ սպասում է քաղաքապետի պաշտոնական պատասխանին:
