ԱԳ նախարարության լրատվական ծառայությունից «Առաջին լրատվական»-ին տեղեկացնում են, որ դեկտեմբերի 4-ին Հորդանանի Հաշիմյան Թագավորությունում Հայաստանի Հանրապետության դեսպան Արշակ Փոլադյանը (նստավայրը` Դամասկոս) իր հավատարմագրերն է հանձնել Հորդանանի Թագավոր Աբդալլահ Երկրորդին:
Հավատարմագրի հանձնման հանդիսավոր արարողությունից հետո կայացած կարճատև առանձնազրույցի ընթացքում Աբդալլահ Երկրորդը շնորհավորել է ՀՀ դեսպանին նշանակման կապակցությամբ և մաղթել հաջողություն իր առաքելության մեջ: Իր խոսքում Հորդանանի Թագավորն ընդգծել է նաև, որ Հորդանանում ջերմ զգացմունքներ են տածում հայ ժողովրդի նկատմամբ, ինչպես նաև բարձր է գնահատել հայ համայնքի դերը երկրի զարգացման գործում:
Դեսպան Արշակ Փոլադյանն իր հերթին Աբդալլահ Երկրորդին փոխանցել է ՀՀ Նախագահ Սերժ Սարգսյանի ողջույններն ու բարեմաղթանքները Թագավորին ու Հորդանանի ժողովրդին, ինչպես նաև հատուկ ընդգծել երկու երկրների միջև պատմականորեն ձևավորված և ժամանակի փորձությունը բռնած բարեկամությունը էլ ավելի ամրապնդելու և խորացնելու անհրաժեշտությունը:
Պաշտոնական արարողության շրջանակներում դեսպան Արշակ Փոլադյանը ծաղկեպսակներ է զետեղել Հորդանանի նախորդ երեք Թագավորների շիրիմներին:
Հորդանան կատարած այցի շրջանակներում դեսպան Արշակ Փոլադյանը հանդիպումներ է ունեցել նաև ՀՀԹ ԱԳ նախարարության գլխավոր քարտուղար Մոհամմեդ Ալի Դահերի, Եվրոպայի երկրների վարչության պետ դեսպան Հուսամ ալ-Հուսեյնիի, Բարձրագույն կրթության և գիտության նախարար Ռովայդա ալ-Մաայտահի, ինչպես նաև հորդանանահայ համայնքի ներկայացուցիչների հետ:
Հանդիպումների ընթացքում քննարկվել են հայ-հորդանանյան հարաբերությունների հետագա զարգացման հնարավոր ուղղություններն ու հեռանկարները:
