Քաղաքագետ Ստեփան Գրիգորյանը դրական է գնահատում ԵԱՀԿ գործող նախագահ, Լիտվայի ԱԳ նախարար Աուդրոնյուս Աժուբալիսի այն հայտարարությունը, որ անհրաժեշտ է ակտիվացնել ԼՂ հակամարտության գոտում գրանցվող միջադեպերի շուրջ հետաքննություններ անցկացնելու մեխանիզմը: Այս մասին նա հայտնեց «Առաջին լրատվական»-ի հետ զրույցում:
«Լիտվան իր այս դիրքորոշման մասին ասել է շատ ավելի վաղ: Աժուբալիսը ԵԱՀԿ նախագահի պաշտոնը ստանձնելիս նշում էր, որ շատ կարևոր է հակամարտող կողմերի միջև վստահության աստիճանը բարձրացնել, այսինքն՝ լարվածությունը թուլացնելու համար պետք է կոնկրետ քայլեր ձեռնարկել: Լիտվայի այս առաջարկն, իմ կարծիքով, շատ դրական էր: Տարվա սկզբին Լիտվան անգամ առաջարկում էր ղարաբաղա-ադրբեջանական շփման գծից հեռացնել դիպուկահարներին, ինչը շատ դրական առաջարկ էր: Աժուբալիսի՝ այս անգամ արած հայտարարության մեջ (որին ես շատ դրական եմ վերաբերվում), իմ կարծիքով, բացակայում է մի կետ. ավելի լավ կլիներ, եթե նշված լիներ, որ, օրինակ, դիպուկահարները պետք է դուրս բերվեն շփման գծից, փակագծերը բացվեին»,- նկատեց Ստեփան Գրիգորյանը:
Անդրադառնալով ԵԱՀԿ Արտգործնախարարների խորհրդի նիստում ԱՄՆ պետքարտուղար Հիլարի Քլինթոնի այն հայտարարությանը, որ ղարաբաղյան հակամարտությունը կարող է կարգավորվել միայն բանակցային ճանապարհով, և որ Վաշինգտոնն աջակցում է ԵԱՀԿ Մինսկի խմբի գործունեությանը, քաղաքագետը նկատեց. «Սա մեսիջ է առաջին հերթին Ադրբեջանին, որ հակամարտությունն այլ ճանապարհով լուծելն անհնարին է, որ Ադրբեջանը մտքից հանի խնդիրը ռազմական ճանապարհով լուծելու գաղափարը: Մեսիջն ուղղված է Ադրբեջանին, քանի որ այնտեղից են հնչում ռազմատենչ հայտարարությունները: Ընդհանուր առմամբ, դրական է, որ այս միտքը բացի ԵԱՀԿ պաշտոնյաներից, արտահայտում է նաև ԱՄՆ պետքարտուղարը»,- ամփոփեց Ստեփան Գրիգորյանը:
