Ադրբեջանական APA լրատվական գործակալության փոխանցմամբ, ԵԱՀԿ Մինսկի խմբի համանախագահող երկրների պատվիրակությունների ղեկավարներն ու Հայաստանի և Ադրբեջանի արտգործնախարարները Վիլնյուսում հանդես են եկել հայտարարությամբ, որում ընդգծել են ղարաբաղյան հակամարտության խաղաղ կարգավորման կարևորությունը։
Համապատասխան հայտարարությունն արվել է Վիլնյուսում ԵԱՀԿ Արտգործնախարարների խորհրդի 18-րդ նիստում՝ Ռուսաստանի, Ֆրանսիայի ու ԱՄՆ-ի պատվիրակությունների ղեկավարների՝ Սերգեյ Լավրովի, Ժան Լեոնետիի, Հիլարի Քլինթոնի և Հայաստանի ու Ադրբեջանի արտգործնախարարներ Էդվարդ Նալբանդյանի ու Էլմար Մամեդյարովի անունից։
Հայտարարության մեջ նշված է, որ 5 պատվիրակությունների ղեկավարները համաձայնության են եկել ԵԱՀԿ Մինսկի խմբի ձևաչափի շրջանակներում բանակցային գործընթացի անհրաժեշտության և խնդրի խաղաղ կարգավորման հարցում առաջընթացի ապահովման համար կլիմայի բարելավման շուրջ։
Տվյալ ուղղությամբ քայլերից մեկն էլ այն է, որ նրանք համաձայնել են իրենց հետագա ջանքերն ուղղել շփման գծում հրադադարի ռեժիմի խախտումների հետաքննման մեխանիզմի գործարկման ուղղությամբ, ինչի մասին պայմանավորվածությունը ձեռք է բերվել այս տարվա մարտին Սոչիում տեղի ունեցած Սարգսյան-Ալիև-Մեդվեդև եռակողմ հանդիպման ժամանակ։
Հայտարարության մեջ նաև նշված է, որ թեպետ ԵԱՀԿ Մինսկի խմբի համանախագահող երկրների նախագահների դովիլյան հայտարարությանը, որով Հայաստանին ու Ադրբեջանին կոչ էր արվում ավարտին հասցնել ղարաբաղյան հակամարտության կարգավորման վերաբերյալ «հիմնարար սկզբունքների» վրա տարվող աշխատանքները՝ հակամարտող կողմերը, դժբախտաբար, չեն կարողացել հասնել այդ վճռորոշ քայլերին։
Հայտարարության մեջ հերթական անգամ ընդգծված է, որ ղարաբաղյան հակամարտությունը չի կարող կարգավորվել ռազմական ճանապարհով։
Հայաստանի ու Ադրբեջանի արտգործնախարարներն իրենց հերթին հայտարարության մեջ երախտագիտություն են հայտնել համանախագահող երկրներին՝ ներդրած ջանքերի համար։ Դա նաև վերաբերում է նախագահներ Մեդվեդևի, Օբամայի ու Սարկոզիի անձնական մասնակցությանը։
Հայաստանի ու Ադրբեջանի արտգործնախարարները ԵԱՀԿ Մինսկի խմբի համանախագահող երկրների պատվիրակությունների ղեկավարներին իրազեկել են, որ Հայաստանի ու Ադրբեջանի նախագահները պատրաստ են մոտ ժամանակներս հերթական հանդիպում անցկացնել ԵԱՀԿ Մինսկի խմբի հովանու ներքո և շարունակել ուղիղ երկխոսությունը՝ հենվելով վերջին տարիների փորձի վրա՝ իրենց ժողովուրդներին խաղաղություն, կայունություն ու բարգավաճում պարգևելու համար։
