Lenta.ru-ն, հղում անելով ամերիկյան NBS հեռուստաալիքին, հայտնում է, որ օրեր առաջ Իրանում վայր գցված անօդաչու թռչող սարքը (ԱԹՍ) պատկանել է ամերիկյան կենտրոնական հետախուզական վարչությանը (ԿՀՎ)։
NBS-ն, վկայակոչելով ԱՄՆ պաշտոնատար անձանց շրջանում ունեցած իր աղբյուրը, հայտնում է, որ RQ-170 Sentinel տիպի այդ ԱԹՍ-ն գաղտնի առաքելություն է կատարել։ Միևնույն ժամանակ չի հստակեցվում, թե նա ո՞ր երկրում (Իրան կամ Աֆղանստան) պետք է կատարեր այդ առաջադրանքը։
Աղբյուրի պնդմամբ՝ ամենայն հավանականությամբ, այդ ԱԹՍ-ն դուրս է եկել ամերիկյան հետախույզների վերահսկողությունից և առաջ շարժվել դեպի Իրանի տարածքի խորքային հատված։ Այն բանից հետո, ինչ սպառվել է ԱԹՍ-ի վառելիքը, այն ընկել է Իրանի արևելյան լեռնային հատվածում։
NBC-ի տվյալներով՝ ամերիկյան զինվորականները նմանատիպ ԱԹՍ գործածել են մի քանի ամիս առաջ Պակիստանում՝ «Ալ Քաիդա»-ի նախկին առաջնորդ Ուսամա բեն Լադենի տեղաշարժին հետևելու համար։
Հիշեցնենք, որ դեկտեմբերի 4-ին իրանական կողմը հայտարարեց, թե իր զինծառայողները վայր են գցել RQ-170 Sentinel տիպի ԱԹՍ։ Նախնական տեղեկություններով՝ այն պատկանել է Աֆղանստանում գտնվող Միջազգային անվտանգության աջակցության ուժերին (ISAF)։
