Հայ ազգային կոնգրեսի ներկայացուցիչ, Հայաստանի ՆԳ նախկին նախարար Սուրեն Աբրահամյանը ողբերգություն չի տեսնում նրանում, որ Ռուսաստանում կայացած խորհրդարանական ընտրություններում իշխող Единая Россия կուսակցությունը զգալի քիչ քվեներ է ստացել: Նման տեսակետ նա հայտնեց «Առաջին լրատվական»-ի հետ զրույցում:
«Սա Единая Россия համար ողբերգություն չէ, որովհետև, բացի կոմունիստներից, բոլորն էլ իշխանությունների կողմից սարքված, իշխանամետ կուսակցություններ են: Որքան էլ նրանք բարձր ձայնով գոռան, որքան էլ քննադատեն ռուսաստանյան իշխանություններին, միևնույն է, վերջին հաշվով նրանց կողմից սարքված կուսակցություններ են: Այնպես որ, իրենց խնդիրը, գուցե, միջազգային հանրության աչքում արդար, օբյեկտիվ ընտրություններ ցույց տալն էր: Թե չէ իրենք էլ կդնեին, ամեն ինչ «չորով կանեին»,- նկատեց Սուրեն Աբրահամյանը:
Նրա խոսքով՝ «ինչ վերաբերում է մերոնց, ապա եթե ՀՀԿ-ն կարողանա իրեն խոնարհ գործընկերներ գտնել, ինքն էլ կարող է իրեն նման շռայլություն թույլ տալ, իսկ եթե ոչ՝ «չորով կդնեն» և մեծամասնություն կկազմեն»:
Ամփոփելով՝ ՀԱԿ ներկայացուցիչը նկատեց. «Ինչ նրանք են անում, սրանք ավելի կոշտուկոպիտ, գռեհիկ ձևով են անելու»:
