Գիլմենդում բրիտանացի զինվորականը 10-ամյա աֆղանցի տղային սվինով հարվածելու համար հեռացվել է բանակից և դատապարտվել մեկուկես տարվա ազատազրկման: Այս մասին հաղորդում է BBC-ն:
Միջադեպը տեղի է ունեցել անցած տարվա մարտին: Դենիել Կրուկը միջադեպից մեկ օր առաջ խմիչքից թունավորվելու պատճառով հայտնվել էր հիվանդանոցում:
Դուրս գալով հիվանդանոցից՝ նա զինվել է երկու նռնակով և սվինով, քանի որ հրացանը անվտանգության նկատառումներից ելնելով նրա ձեռքից վերցրել էին:
Ճանապարհին նա հանդիպել է երեխաների, ովքեր նրանից շոկոլադ էին խնդրել: Կրուկը նրանցից մեկին սվինով հարվածել է:
Տղայի հայրը հայտնում է, որ երեխան մինչև հիմա չի ապաքինվել և չի կարողանում գնալ դպրոց: Բրիտանացի զինվորականները այդ տղայի ընտանիքից այդպես էլ ներողություն չեն խնդրել:
