Ոստիկանությունը դարձել է «բռնող մարմին»: Այսօր «Առաջին լրատվական»-ի հետ զրույցում նման տեսակետ հայտնեց իրավապաշտպան Սեդա Սաֆարյանը`խոսելով ՀՀ ոստիկանության դերի և իրականացրած գործունեության շուրջ: Ըստ նրա` ՀՀ ոստիկանության վիճակը բարվոք չէ:
Իրավապաշտպանը համակարծիք է նրանց, ովքեր գտնում են, որ ոստիկանությունը վեր է ածվել բռնող մարմնի: Նրա մեկնաբանմամբ, քաղաքացիների գլխին խնդիր սարքելը դարձել է արհեստի նման մի բան. կարևոր չէ, թե ով է նախահարձակ լինում, կարևոր չէ, թե ոստիկանն ինչպես է իրեն պահում քաղաքացու հետ:
«Մի տեսակ ոստիկանության դերը նվազել է, օրինականություն, օրենք, մարդկանց պաշտպանելու պարտականություն չկա: Ես չեմ տեսել, որ ոստիկանների գործերով չպատժվեն մարդիկ, ինչքան էլ համոզիչ փաստարկներ բերվեն»,- մեկնաբանեց Ս. Սաֆարյանը` համոզմունք հայտնելով, որ
ուսումնասիրությունը բերել է նրան, որ շատ արատավոր իրավիճակ է, և թացը չորի հետ խառնվել է:
«Ոստիկաններն ինչով են զբաղված, չեմ կարող ասել: Եթե անգամ իրենք մարդ են բռնում, ապա մարդուն բռնելու ամբողջ պատասխանատվությունը գարշանք է առաջացնում, երբ գործը վերլուծում ես: Դրա հիմքում շահն է դրված: Ես չեմ կարող ասել, թե որքանն է օրինական նրանց գործողություններում»,- մանրամասնեց Ս. Սաֆարյանը`հավելելով, որ հակված չէ ասելու, թե ոստիկանությունը օրինական դաշտում է աշխատում: Նրա համոզմամբ`օրինական չի աշխատում ոստիկանությունը: Իրավապաշտպան Ս. Սաֆարյանը նաև նշեց, որ ոստիկանությունը պետք է կանխարգելիչ դեր ունենա, որը չկա:
