Թեհրանի համալսարանում այսօրվա աղոթքի ժամանակ, երբ հոգևորականը հորդորել է ՄԱԿ-ին և ԵՄ-ին չմիանալ Անգլիային, ուսանողները բղավել են «Մա՛հ Բրիտանիային»։
Հոգևորական Ահմադ Խաթամին մեղադրել է բոլոր նրանց, ովքեր միացել են «ստոր» Բրիտանիային, ներառյալ՝ ԵՄ-ին, որը հավանաբար կավելացնի պատժամիջոցներն Իրանի դեմ՝ վերջինիս միջուկային ծրագրի պատճառով:
Ինչպես արդեն հաղորդել ենք, Բրիտանիան Թեհրանից հետ է կանչել իր դիվանագետներին և փակել Իրանի դեսպանատունը Լոնդոնում: Եվրոպական միության շատ երկրներ ևս Իրանից հետ են կանչել իրենց դեսպաններին: Իսկ ՄԱԿ-ի Անվտանգության խորհուրդը հայտնել էր, որ խստորեն դատապարտում է հարձակումը:
Խաթամին ասել է, թե Անվտանգության խորհուրդը ցույց է տվել, որ իրենք նույնքան վատն են, որքան Բրիտանիան, իսկ Իրանի հոգևորականները համոզվել են, որ Եվրոպան փորձում է վերացնել իսլամական համակարգը:
«Իրանի դեմ հայտարարություն անելը նշանակում է Բրիտանիայի ստոր կապի միջոցով ջրհորն ընկնել»,– ասել է Խաթամին ավելացնելով, որ եթե ՄԱԿ-ն ու ԵՄ-ն մի փոքր իմաստուն գործեն, ապա ոչ մի կապ չեն ունենա Բրիտանիայի հետ:
Չնայած Արևմուտքում տնտեսական ճգնաժամին` աշխարհի նավթ արտահանող հինգերորդ ամենամեծ երկրի հետ լարված հարաբերությունների պատճառով նավթի գները բարձրացել են: