Վերջին ժամանակների բոլոր նշանակումները, այդ թվում՝ «Մարտի 1»-ի գործով քննչական խմբի նախկին ղեկավար Վահագն Հարությունյանի և ԱԺ փոխխոսնակ Սամվել Նիկոյանի նշանակումները, խոսում են այն մասին, որ Մարտի 1-ի գործընթացների հետ որոշակի առնչություն ունեցող ներկայացուցիչներն ակնհայտ պաշտոնների բարձրացում են ունենում: «Առաջին լրատվական»-ի հետ զրույցում այս մասին հայտարարեց մարտիմեկյան իրադարձությունների ուսումնասիրման նախկին Փաստահավաք խմբի անդամ Անդրանիկ Քոչարյանը:
«Սամվել Նիկոյանի պաշտոնական առաջխաղացումը, ըստ էության, կապված է նաև այդ գործընթացներին որոշակի ծառայություն մատուցելու հետ: Իհարկե, նա բնականաբար այլ ծառայություններ էլ մատուցած կլինի, բայց իր հիմնական ծառայությունը, ըստ էության, Մարտի 1-ին վերաբերող բազմաթիվ փաստարկների անտեսումն ու կոծկման հետ առնչվելն է»,- ամփոփեց Քոչարյանը:
Հիշեցնենք որ ՀՀԿ խորհրդի դեկտեմբերի 1-ի նիստում որոշում է կայացվել ԱԺ նախագահի պաշտոնում առաջադրել Սամվել Նիկոյանի թեկնածությունը: Նա այժմ խորհրդարանի փոխնախագահն է, նաև ԱԺ նախագահի պաշտոնակատարը:
Որոշվել է նաև ԱԺ փոխնախագահի պաշտոնում առաջադրել Էդուարդ Շարմազանովի թեկնածությունը, իսկ ԱԺ ՀՀԿ խմբակցության քարտուղարի պաշտոնում` Գագիկ Մելիքյանի թեկնածությունը: