Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ Երևանի քաղաքապետ Տարոն Մարգարյանը հանդիպել է գերմանական Կարմիր խաչի արտաքին կապերի տնօրեն Միխայիլ Վիբելի հետ։
Հանդիպման ընթացքում կողմերը երկուստեք վերահաստատել են գործակցությունն առավել սերտ ու նպատակային դարձնելու պատրաստակամությունը:
Տ. Մարգարյանն ընդգծել է, որ Երևանի քաղաքապետարանը պատրաստ է արագ արձագանքել գերմանական Կարմիր խաչի երևանյան գրասենյակի բարեգործական առաքելության շրջանակում առաջացող խնդիրներին, որոնց լուծումը գտնվում է տեղական իշխանության լիազորությունների տիրույթում:
Որպես ասվածի վառ օրինակ քաղաքապետը բերել է Երևանի ավագանու որոշմամբ գերմանական Կարմիր խաչի երևանյան գրասենյակին գույքահարկի արտոնություն տրամադրելու փաստը:
«Գիտեմ, որ բարեգործական ձեր առաքելության շրջանակում անչափ կարևոր է նաև մեր վարչական շրջանների պատասխանատվությունն այդ հարցում, ուստի մեկ անգամ ևս վստահեցնեմ ձեզ, որ մենք պատրաստ ենք շարունակել սոցիալական համատեղ ծրագրերն ու ենթածրագրերը, քանի դեռ Երևանում առկա է սոցիալապես անապահով քաղաքացիների հոգսերը թեթևացնելու անհրաժեշտությունը»,- շեշտել է քաղաքապետը։
Մ. Վիբելը որպես արդյունավետ փոխգործակցության օրինակ է բերել կազմակերպության և Քանաքեռ-Զեյթուն վարչական շրջանի միջև ձևավորված երկարամյա համագործակցությունը:
Միայն այս վարչական շրջանում 350 շահառուներ օգտվում են «Գթության խոհանոցից»:
Մ. Վիբելը գերմանական Կարմիր խաչի նախագահ դոկտոր Լորենց Մենցի անունից շնորհավորել է Տ. Մարգարյանին` Երևանի քաղաքապետի պաշտոնում ընտրվելու կապակցությամբ և փոխանցել է նրա ուղերձը։
Մ. Վիբելը նաև տեղեկացրել է, որ Հայաստանին ուղղված մարդասիրական ծրագրերի համար Կ.Հ. Շայդեն այս տարի պարգևատրվելու է Գերմանիայի Դաշնային Հանրապետության նախագահի բարձրագույն շքանշանով: