Երևանի քաղաքապետարանի տեղեկատվության
և հասարակայնության հետ կապերի վարչությունից «Առաջին լրատվական»-ին տեղեկացնում են, որ Երևանի քաղաքապետ Տարոն Մարգարյանն ընդունել է «Վեոլիա ջուր» ընկերության ԱՊՀ երկրների, Թուրքիայի և Կենտրոնական Ասիայի տարածաշրջանային ծրագրերի տնօրեն Ռեմի Պոլին և «Երևան Ջուր» ընկերության գլխավոր տնօրեն Գոռ Գրիգորյանին:
Շնորհավորելով Երևանում ընկերության 5-ամյա գործունեության կապակցությամբ` քաղաքապետը նշել է, որ այս ընթացքում եղել են ձեռքբերումներ և բացթողումներ։
Նա, սակայն, նաև նշել է, որ «Երևան Ջուր» ընկերության գլխավոր տնօրենի վերջին փոփոխությունից հետո մատուցվող ծառայությունների առումով դրական տեղաշարժ է արձանագրվել:
Անդրադառնալով «Վեոլիա» և «Երևան Ջուր» ընկերությունների պայմանագրային պարտավորությունների կատարմանը` Տ. Մարգարյանը հույս է հայտնել, որ միասնական աշխատանքի արդյունքում կբարելավվի ջրամատակարարման և ջրահեռացման ծառայությունների որակը, օպերատիվ լուծում կստանան առկա խնդիրները, որոնցից գլխավորը մայրաքաղաքում շուրջօրյա ջրամատակարարում ապահովելն է:
«Հույս ունենք, որ մայրաքաղաքում շուրջօրյա ջրամատակարարում ապահովելու ձեր խոստումը կապահովեք հնարավորին կարճ ժամկետում:
Սա թե՛ մեր, և թե՛ մեր համաքաղաքացիների հիմնական ակնկալիքն է ձեզանից: Եվ դա պետք է լինի առարկայական, այլ ոչ թե փաստաթղթային տեսքով:
Կարծում եմ` նախ և առաջ պետք է հասնել նրան, որ ջրամատակարարման 15-16 ժամյա ձմեռային գրաֆիկը պահպանվի նաև ամռանը, ինչն էլ կհանդիսանա ձեր հանդեպ վստահության վերականգնման լավագույն գրավականը»,- նշել է Տ. Մարգարյանը:
Ռ. Պոլը, անդրադառնալով Երևանի քաղաքապետի նշած թերացումներին ու դիտարկումներին, պարտավորվել է հաշվի առնել ու անհրաժեշտ քայլեր ձեռնարկել դրանք շտկելու ուղղությամբ:
