«Վարկած» ակումբի այսօրվա հյուրն էր ՀՌԱԿ ատենապետ Հարություն Առաքելյանը:
Ասուլիսի մասնակիցներին նախ բաժանվեց ՀՌԱԿ կուսակցության շրջանակների ատենապետների և հանրապետական վարչության համատեղ հայտարարությունը, որում նշվում է` ատենապետները մամուլից են տեղեկացել, որ դեկտեմբերի 1-ին ՀՌԱԿ-ից վտարված Է.Անտինյանը և սփյուռքի կառույցի կուսակցությունից վտարված Հ. Ավետիքյանը համատեղ կազմակերպել են ինչ-որ կուսակցությունների միավորման գործընթաց:
Նրանք հայտարարում են` «որևէ քննարկում չի կազմակերպվել որևէ կուսակցության հետ միավորվելու կապակցությամբ, քանի որ միավորվելու որևէ առաջարկ չի էլ ստացվել ՀՌԱԿ ղեկավարության անունով»:
«Նմանատիպ միջոցառումները համարում ենք ավանդական կուսակցության հանդեպ իրականացվող թրքաբարո գործողություն և հանրությանը ապատեղեկատվություն տարածելու փորձ»:
Հարություն Առաքելյանը նշեց, որ այդ մարդկանց միավորման փաստը կապում է Տիգրան Սարգսյանի հետ, որը գործում է իր դեմ:
Նա նշեց` Հակոբ Ավետիքյանը պարտք է Տիգրան Սարգսյանին, քանի որ Հակոբ Ավետիքյանի տղային աճեցրել է Տիգրան Սարգսյանը` աշխատանքի նշանակելով Կենտրոնական բանկում:
Ըստ Առաքելյանի` Անտինյանը մշտապես ասել է, որ մոտ է վարչապետի եղբոր հետ. «Ավետիքյանն էլ, Անտինյանն էլ օրենքի հետ խնդիրներ ունեն: Լիբանանի քաղաքացին միշտ մնում է Լիբանանի քաղաքացի, հետևաբար նա արհամարհում է ՀՀ օրենքները: Անտինյանը 2011թ. մարտին արդարադատության նախարարությունում գրանցել է կուսակցությունը և կեղծել քարտուղարի ստորագրությունը»:
Հարություն Առաքելյանը նշեց, որ երկուսն էլ պատքեր ունեն, բայց կարողանում են «Մարիոթում» անգամ ֆուրշետ կազմակերպել, Տ. Սարգսյանը հեռուստաընկերություններ է ուղարկում` այդ միջոցառումը նկարահանելու: Հարություն Առաքելյանը նշեց, որ Ավետիքյանն ու Անտինյանը միշտ էլ միասնական են եղել, այդ մասին նախկինում էլ կասկածներ եղել են, իսկ երեկվա միջոցառման ժամանակ ապացուցվել են այդ կասկածները: