News Georgia-ի փոխանցմամբ՝ այս առավոտ Թբիլիսիում դադարեցվել է ընդդիմադիր «Մաեստրո» հեռուստաալիքի հեռարձակումը։ Նշվում է, որ վրացական իշխանությունները կապ չունեն դրա հետ, և խնդիրը հեռուստաալիքի սեփականատերերի ու տվյալ հեռուստաալիքը ղեկավարող «Մեդիա Ռուսթավի» ընկերության հիմնադիր Էրոսի Կիցմարիշվիլիի միջև է։
Վերջինս երեկ երկոյան ընկերության ղեկավարման պաշտոնից ազատել է գլխավոր տնօրեն Իլյա Կիկաբիձեին։ Կիցմարիշվիլին հայտարարել է, որ իր ընկերությունն իրավունք ունի ղեկավարել «Մաեստրո»-ին, ինչի համար էլ իր գործողություններն օրինական են։
Այս ամենի հետ կապված՝ լրագրողական շրջանակներում շրջանառվում է մի վարկած, թե «Մաեստրո» հեռուստաալիքը մտադիր է գնել քաղաքական ասպարեզում հայտնված ընդդիմադիր միլիարդատեր Բիձինա Իվանիշվիլին։