Թուրքական Zaman թերթի փոխանցմամբ՝ Ֆրանսիան Թուրքիային հրավիրել է մասնակցելու Սիրիայի դեմ կիրառվելիք քայլերի վերաբերյալ ԵՄ արտգործնախարարների առաջիկա ժողովին։ Այս մասին հայտարարել է Ֆրանսիայի ԱԳՆ-ի խոսնակ Բեռնարդ Վալերոն։
Վերջինս կարևորել է հինգշաբթի օրը Բրյուսելում կայանալիք այդ ժողովում Թուրքիայի արտգործնախարարի ու Արաբական երկրների լիգայի (ԱԵԼ) գլխավոր քարտուղարի ներկայությունը։
Վալերոն ընդգծել է, որ իրենք գոհ են Սիրիայի հանդեպ Թուրքիայի ու ԱԵԼ-ի որդեգրած դիրքորոշումից։
Հիշեցնենք, որ մոտ 10 օր առաջ Ֆրանսիայի արտգործնախարար Ալեն Ժյուպեի թուրքական այցի արդյունքում կողմերը պայմանավորվել էին խստացնել Սիրիայի նկատմամբ պատժամիջոցներն ու ուժեղացնել Սիրիայի վրա գործադրվող ճնշումները։