РБК-ի փոխանցմամբ՝ Մեծ Բրիտանիայի իշխանությունները ափսոսանք են հայտնել Իրանի հետ դիվանագիտական հարաբերությունների մակարդակի նվազեցման կապակցությամբ, ըստ որի՝ Իրանում Մեծ Բրիտանիան պետք է ներկայացնի ոչ թե դեսպան, այլ՝ ժամանակավոր հավատարմատար։ Այս մասին հայտարարել է Մեծ Բրիտանիայի կառավարության ներկայացուցիչը.
«Մենք կքննարկենք պատասխան միջոցների բնույթը։ Այդ հարցն ընդգրկված է Թեհրանում ԵՄ անդամ երկրների դիվանագիտական առաքելությունների ղեկավարների այսօրվա հանդիպման, ինչպես նաև դեկտեմբերի 1-ին ԵԽ արտգործնախարարների խորհրդակցության օրակարգում»։
Հիշեցնենք, որ Իրանի խորհրդարանի ու Սահմանադրության պահակազորի խորհրդի կողմից Մեծ Բրիտանիայի հետ դիվանագիտական հարաբերությունների մակարդակը նվազեցնելու մասին օրինագծի հաստատմամբ Իրանի ԱԳՆ-ն պարտավոր է երկու շաբաթվա ընթացքում երկրից արտաքսել մոտ մեկ ամիս առաջ Իրանում Մեծ Բրիտանիայի դեսպան նշանակված Դոմինիկ Չիլկոտին։
Լոնդոնը չի կարող նրան փոխարինել այլ դիվանագետով, քանի որ իրանական կողմը որոշել է նվազեցնել Մեծ Բրիտանիայի հետ դիվանագիտական հարաբերությունների մակարդակը։ Այսուհետ Իրանում Մեծ Բրիտանիայի դիվանագիտական ներկայացուցչությունը կարող է գլխավորել միայն ժամանակավոր հավատարմատարը։
