Ադրբեջանական Vesti.az-ի փոխանցմամբ՝ ադրբեջանցիների համառուսաստանյան կոնգրեսի մոսկովյան բաժնի ղեկավար Իլգար Հաջիևը հայտարարել է, որ ադրբեջանցիները չեն մասնակցել Մոսկվայի Старый Баку սրճարանի մոտ տեղի ունեցած ծեծկռտուքին.
«Թեև այդ սրճարանը իսկապես պատկանում է ադրբեջանցիներին, սակայն նրանք որևէ մասնակցություն չեն ունեցել երեկ առավոտյան տեղի ունեցած այդ ծեծկռտուքին։ Սրճարանի մոտ տեղի ունեցած ծեծկռտուքի արդյունքում սպանվել է Մոսկվայի բնակիչ Կարեն Հարությունյանը։
Մեր տեղեկություններով՝ երբ առավոտյան Կարենն իր կնոջ՝ Յուլիայի հետ քայլելիս է եղել, ինչ-որ մեկը սկսել է անհանգստացնել նրա կնոջը։ Սկսվել է վեճ, որի արդյունքում էլ սպանվել է Հարությունյանը։ Մեր ներկայացուցիչներն արդեն իսկ այցելել են դեպքի վայր և ճշտել, որ ադրբեջանցիները մասնակցություն չեն ունեցել դրանում։
Այդ մասին խոսակցությունները ծնունդ են առել միայն նրա համար, որ այդ ամենը տեղի է ունեցել Старый Баку սրճարանի մոտ։ Այդ կապակցությամբ մամուլը շտապել է տեղի ունեցածը վերագրել ադրբեջանցիներին»։
Հիշեցնենք, որ ըստ հայկական ու ռուսական ԶԼՄ-ների՝ Старый Баку սրճարանի մոտ տեղի ունեցած ծեծկռտուքի արդյունքում սպանվել է Մոսկվայի 38-ամյա մի բնակիչ, իսկ տարբեր մարմնական վնասվածքներով հոսպիտալացվել են 42-ամյա թիկնապահն ու 20-38 տարեկան 4 գործազուրկներ (բոլորն էլ հայեր են)։ Նրանցից երկուսը ունեն հրազենային վնասվածքներ։