Վաղը հեռուստատեսության եւ ռադիոյի ազգային կոչվող եւ իբր անկախ համարվող հանձնաժողովը հրապարակելու է հեռուստահեռարձակման արտոնագրերի հերթական մրցույթի արդյունքները: Այսինքն` վաղը հերթական անգամ հասարակությունը սպասում է պատասխանի` կտա՞ն եթեր «Ա1+»-ին, թե՞ չեն տա: Ավելի ճիշտ, ամենայն հավանականությամբ, գրեթե կասկած չկա, որ հասարակությունը կրկին կտեսնի, որ հերթական անգամ «Ա1+»-ին չտվեցին եթերի հնարավորություն: Հիշեցնենք, որ «Ա1+»-ը արտոնագրի համար մրցույթում միեւնույն հաճախականության վրա մրցակցում է «Արմնյուզ» հեռուստաընկերության հետ, որը պատկանում է Սարգսյանների ընտանիքին: Խոսքը «Արմենիա» հեռուստաընկերության սեփականատեր Սարգսյանների մասին է, որոնց հետ միջնորդավորված փայատեր է նաեւ Սերժ Սարգսյանի աշխատակազմի ղեկավարի տեղակալ, Սերժ Սարգսյանի փեսա Միքայել Մինասյանը` Միշիկը: Մինասյանն ընդհանրապես այսօր հանդիսանում է Հայաստանի հեռուստատեսային դաշտի կուրատորը նախագահական նստավայրում: Այսինքն` նա է որոշում, թե ով ինչ պետք է ասի, ով ում պետք է եթերում հյուրընկալի, ով ինչ պետք է պատրաստի հեռուստատեսային հերթական խոհանոցում, ով պետք է մեռնի եւ ով վերակենդանանա այս կամ այն հեռուստասերիալի հերթական սերիայում: Ահա այսպիսի սերիալախոհանոցային հեռուստամիջավայր ձեւավորած անձնավորությունը, բնականաբար, պետք է ՀՌԱՀ-ին կարգադրի, որ արտոնագիր պետք է տալ այդ սերիալախոհանոցային եթերի լոկոմոտիվներից մեկը հանդիսացող, Սարգսյանների ընտանիքին պատկանող հեռուստաընկերությանը: Միքայել Մինասյանն այսօր Գագիկ Բեգլարյանին է հաղթում, ինչը նշանակում է, որ ազատ խոսքին հաղթելը նրա համար այնքան էլ մեծ դժվարություն չի ներկայացնում, առավել եւս, որ ազատ խոսքը այսօր Հայաստանի իշխանությունների համար շատ ավելի վտանգավոր եւ սարսափելի է, քան նախագահականի աշխատակիցներ ծեծող Բեգլարյանը: Այդ իսկ պատճառով էլ վաղը հաղթելու է սերիալներով, հեռուստախոհանոցներով, էժանագին շոուներով եւ փողոցային ժարգոնով ու հումորով լցված հեռուստաեթերը, որովհետեւ այդ եթերը իշխանության համար ամենաանվտանգն է, թույլ է տալիս կառավարել հասարակության բնազդները` բթացնելով գիտակցությունը: Իշխանությանն այսօր պետք է բնազդ, ոչ թե գիտակցություն արթնացնող հեռուստաեթեր, որովհետեւ բնազդով առաջնորդվող հանրությանը կառավարելը հեշտ է: Իսկ «Ա1+»-ին եթեր տալը նշանակում է ճանապարհ տալ հասարակության իրազեկվածությանը, հասարակական եւ քաղաքական տարբեր երեւույթների վերաբերյալ բազմակարծությանը, խոսքի ազատությանը, քաղաքացիական իրավագիտակցության առաջընթացին, այլ կերպ ասած` «անկառավարելի» հասարակությանը: Կասկած չկա, որ իշխանությունը ամեն կերպ փակելու է հեռուստաեթերը իրական բովանդակությամբ լցնելու ճանապարհը, որովհետեւ իրավագիտակից մարդկանց հասարակությունն այսօրվա իշխանության թիվ մեկ սպառնալիքն է: