Այսօր Երևանի «Մարիոթ» հյուրանոցում մեկնարկեց կլոր սեղան` նվիրված ՀՀ քրեական արդարադատության արդի հիմնախնդիրներին: Այն կազմակերպվել է «Համագործակցության ասոցիացիա» երիտասարդական հասարակական միության կողմից` Հայաստանում Եվրոպական միության պատվիրակության կողմից ֆինանսավորվող «Արդարադատություն և քրեական արդարադատություն» ծրագրի շրջանակում:
Ողջույնի խոսքով հանդես եկավ ծրագրի գլխավոր խորհրդատու, ՀՀ դատավորների միության գործադիր տնօրեն, ԵՊՀ դոցենտ, ՀՀ ԳԱԱ ավագ գիտաշխատող, իրավագիտության թեկնածու, դոցենտ Վահե Ենգիբարյանը: Նա ասաց, որ ծրագիրն ունի երկու բաղադրիչ` հասարակություն և իրավապահ մարմիններ, և խնդիրները քննարկվելու են այս ենթատեքստում:
Բացման խոսքով հանդես եկավ նաև ՀՀ դատավորների միության նախագահ Հ. Սարգսյանը: Ըստ նրա` քննարկման նպատակն է գտնել բազմաթիվ չլուծված հարցերի պատասխանը: «Արդարադատության հաստատման համար անհրաժեշտ են կատարյալ օրենքներ: Պետք է կարողանալ դրանք կյանքում կիրառել»,- նշեց Հ Սարգսյանը`ողջունելով նմանատիպ քննարկման կազմակերպումը:
«Արդարադատություն և քրեական արդարադատություն ծրագրի արդյունքները և քաղված դասերը» զեկույցով հանդես եկավ ծրագրի գլխավոր խորհրդատու Վ. Ենգիբարյանը: Կլոր սեղանի ընթացքում զեկույցներ են ներկայացվելու նաև քրեական հիմնախնդիրների արդի վիճակի և առանձնահատկությունների, վերջին զարգացումների և հետագա կատարելագործման հեռանկարների վերաբերյալ: Լինելու են նաև քննարկումներ, մեկնաբանություններ:
