Մեքսիկացի գործարար Կառլոս Սլիմը` Forbes ամսագրի տվայլներով աշխարհի ամենահարուստ մարդը, 1997 թվականաին երեք անգամ գտնվել է կյանքի և մահվան եզրին և միայն հրաշքով է փրկվել: Սա հաստատում է նրա անձնական կենսագիր Խոսե Մարտինեսը, որն այդ մասին գրում է իր «Աշխարհի ամենահարուստ մարդու գաղտնիքները. Կառլոս Սլիմ» գրքում: Այն վաճառքի կհանվի այս շաբաթ:
Ինչպես հայտնում է РИА Новости-ն, գրքի թողարկման մասին հայտնել են մեքսիական ԶԼՄ-ները:
Կենսագիրը նշում է, որ Սլիմի մոտ առաջին անգամ սրտի խնդիրներն ի հայտ են եկել 1992 թվականին, երբ նա դեռ աշխարհի ամենահարուստ մարդը չէր: Այդ ժամանակ նրան տեղափոխել են հոսպիտալ: Հինգ տարի անց Սլիմը կրկին հոսպիտալացվել է աորտայի անևրիզմ աշխատնիշով, և նրան շտապ վիրահատել են: Բժշկական միջամտության ժամանակ Սլիմը երեք անգամ ցույց է տվել կյանքի նշանների բացակայություն, որից հետո բժիշկներից մեկը դուրս է եկել վիրահատարանից և հայտարարել, որ Կառլոսը Սլիմը մահացել է: Սակայն նա հրաշքով փրկվել է և վերականգնել իր առողջությունը: 1997 թվականին Սլիմի «մահվան» մասին լուրերը խուճապ առաջացրեցին մեքսիական բորսայում:
Մարտինեսը նշում է, որ այս դեպքից հետո հարուստն այլ կերպ է սկսել նայել կյանքին: Ձեռք բերելով միլիոններ և գտնվելով մահվան եզրին՝ Սլիմը սկսել է գնահատել այն, ինչը անհնար է գնել փողով:
71-ամյա Սլիմը հայտարարում է, որ մտադիր է մնալ իր տանը, որտեղ ապրում է արդեն 30 տարի և չի ցանկանում է տեղափոխվել ավելի հարմարավետ ու շքեղ տուն: Այդ տունը Սլիմի համար թանկ է, քանի որ այնտեղ մինչև իր մահը`1999 թվականը, ապրել է նրա կինը:
2010 թվականի տվյալներով՝ Սլիմը աշխարհի ամենահարուստ մարդն էր: Նրա կարողությունը գնահատվում էր 74 միլիարդ դոլար, մեկ տարվա ընթացքում նա կարողացել է իր կարողությունը մեծացնել 20 միլիարդ դոլարով: Սակայն Forbes-ի տվյալներով՝ 2011 թվականի ութ ամիսների ընթացքում նրա կարողությունը նվազել է 10,7 միլիարդ դոլարով: Սլիմի հիմնական բիզնեսը Մեքսիկայի և Լատինական Ամերիկայի երկրների հեռուստահաղորդակցման շուկան է:
