Բելգիայում իշխող կոալիցիայի առաջնորդը հրաժարական է տվել` դրանով իսկ ավելի սրելով երկրում քաղաքական ճգնաժամը: Ինչպես հաղորդում է Associated Press-ը, Վալլոնական (ֆրանսալեզու) սոցիալիստական կուսակցության առաջնորդ Էլիո դե Ռուպոն հրաժարականի դիմում է ներկայացրել, քանի որ նոր կառավարություն ձևավորելու շուրջ բանակցությունները ձախողվել են:
Հիշեցնենք, որ Բելգիան արդեն շուրջ մեկուկես տարի չի կարողանում դուրս գալ քաղաքական ճգնաժամից: 2010 թ. հունիսի 13-ին տեղի ունեցած խորհրդարանական ընտրություններց հետո կուսակցությունները չեն կարողանում համաձայնության գալ խորհրդարանական կոալիցիայի ձևավորման շուրջ:
Ընտրություններում հաղթանակ տարած Նոր ֆլամանդական դաշինքը և Վալլոնական սոցիալիստական կուսակցությունը անարդյունք բանակցություններ էին վարում՝ ընդհուպ մինչև ընթացիկ տարվա սեպտեմբերը, երբ նրանց վերջապես հաջողվեց կոալիցիա ձևավորել երեք վալլոնական և 3 ֆլամանդական կուսակցություններից: Սակայն կառավարության վերջնական ձևավորումն այդպես էլ տեղի չունեցավ, քանի որ կողմերը չկարողացան համաձայնության գալ 2012 թ. բյուջեի նախագծի շուրջ:
Նշենք որ Բելգիայում հոլանդախոս բնակչությունը մեծամասնություն է կազմում (շուրջ 6 մլն), իսկ ֆրանսախոսները` փոքրամասնություն (շուրջ 4.5 մլն):
