Իսրայելական Haaretz թերթի փոխանցմամբ՝ Իրանում և Լիբանանում բացահայտվել են ամերիկյան Կենտրոնական հետախուզական վարչության (ԿՀՎ) լրտեսական ցանցեր։ Դա տեղի է ունեցել վերջին ամիսներին։
Նշվում է, որ Լիբանանում «Հիզբոլլահ»-ի հակահետախուզական բաժինը ձերբակալել է լրտեսական ընդարձակ ցանցի անդամներին, որոնք ԿՀՎ-ին իրազեկում էին իր պլանների ու գործունեության մասին։
Ինչ վերաբերում է Իրանին, ապա այստեղ մեկը մյուսի հետևից սկսեցին անհետանալ ամերիկյան, բրիտանական և իսրայելական հետախուզությունների համար աշխատող գործակալները։
Ընդհանուր առմամբ, այս ամենի արդյունքում ԿՀՎ-ն Իրանում ու Լիբանանում կորցրել է 12 գործակալ։ Դրա հետ կապված՝ ԿՀՎ-ն մի շարք փորձառու աշխատակիցներ է ուղարկել Բեյրութ, որոնց առաջադրանք է տվել պաշտպանելու մնացյալ փոքրաթիվ գործակալներին։
Փորձագետները Իրանում և Լիբանանում ԿՀՎ-ի լրտեսական ցանցերի բացահայտումը պայմանավորում են ԿՀՎ-ի աշխատակիցների թափթփվածությամբ ու տեղական հակահետախուզության աշխատակիցների փութաջան ու համբերատար աշխատանքով։
Հիշեցնենք, որ այս տարվա սեպտեմբերի վերջին Իրանն ազատ էր արձակել լրտեսության մեղադրանքով 2009 թվականի հուլիսի վերջին Իրանում ձերբակալված ամերիկյան երկու քաղաքացիների։
