Reuters գործակալության փոխանցմամբ՝ Ֆրանսիան իր գործընկերներից պահանջել է «աննախադեպ մասշտաբի» պատժամիջոցներ կիրառել Իրանի նկատմամբ։
Խոսքը Իրանի Կենտրոնական բանկի ակտիվների անհապաղ սառեցման ու իրանական նավթի գնման դադարեցման մասին է, ինչը կհամապատասխանի Իրանի միջուկային ծրագրի վերաբերյալ ԱԷՄԳ-ի հրապարակած զեկույցում տեղ գտած մտահոգությունների ոգուն։
Ֆրանսիայի նախագահ Նիկոլա Սարկոզին այդպիսի բովանդակությամբ նամակներ է հղել ԱՄՆ-ին, Կանադային, Ճապոնիային, Մեծ Բրիտանիային ու Գերմանիային, ինչպես նաև Եվրահանձնաժողովին ու ԵԽ-ին։ Նամակում մասնավորապես նշված է.
«Քանի որ Իրանն ընդլայնում է իր միջուկային ծրագիրը և հրաժարվում է բանակցություններից՝ դրանով իսկ իր ժողովրդին դնելով մեկուսացման մեջ, Ֆրանսիան պահանջում է աննախադեպ մասշտաբի նոր պատժամիջոցներ սահմանել Իրանի նկատմամբ, որպեսզի վերջինս համոզվի բանակցությունների անցկացման ու իր միջուկային հետազոտություններից հրաժարվելու անհրաժեշտության մեջ»։
Հիշեցնենք, որ նոյեմբերի 8-ին Իրանի միջուկային ծրագրի վերաբերյալ ԱԷՄԳ-ի հրապարակած զեկույցից հետո Իրանի նախագահ Մահմուդ Ահմադինեժադը հայտարարել էր, որ իրենք «ոչ մի քայլ» չեն նահանջելու իրենց միջուկային ծրագրից։
