Դեկտեմբերի 2-4-ը «Թումո» ստեղծարար տեխնոլոգիաների կենտրոնում տեղի կունենա Start-Up Weekend Yerevan միջոցառումը, որը կանցկացվի ArmNet-2011-ի շրջանակներում: «Առաջին լրատվական»-ի հետ զրույցում ծրագրի համակարգող Ժիրայր Թերզյանը հայտնեց, որ yerevan.startupweekend.org կայքում գրանցումն արդեն սկսված է: Երիտասարդ դիզայներները, ծրագրավորողները կհավաքվեն մի վայրում և 2 օրվա ընթացքում կփորձեն ստեղծել ՏՏ նախագծեր՝ կայքեր, ծառայություններ և այլն: Սպասվում է Հայաստանից և հարևան երկրներից՝ Վրաստանից ու Թուրքիայից, մոտ 100 ծրագրավորողների մասնակցություն:
«Իմաստն այն է, որ միջոցառման արդյունքում ՀՀ տնտեսության մեջ ՏՏ ոլորտում ստեղծվեն ձեռնարկություններ: Դա մեր առավելագույն նշաձողն է»,- ասաց Ժ. Թերզյանը՝ նշելով, որ եթե ընկերություններ ստեղծվեն, նրանց հնարավորություն կտրվի ինկուբացիոն շրջանն անցնել եվրոպական և այլ ինկուբատորներում՝ տրամադրելով տարածքներ, ենթակառուցվածքներ, որ ապահովվի ընկերությունների կայուն զարգացումը:
Հիշեցնենք, որ «ԱրմՆետ» ամենամյա կոնֆերանսը կկայանա դեկտեմբերի 3-ին «Թումոյում» և նվիրված կլինի վեբ-տեխնոլոգիաներին և բիզնեսի տարբեր ոլորտներում դրանց ներդրման հնարավորություններին: Կոնֆերանսի հիմնական թեման է` «Նորագույն միտումներ. շարժական ինտերնետ, ամպային տեխնոլոգիաներ»:
Քննարկումները կընթանան շարժական սարքերի տարածումը և դրանց ազդեցությունը ինտերնետի վրա, գովազդ ցանցում, ֆինանսավորում և ներդրումներ, խաղեր, ժամանց, երաժշտություն մոբայլ սարքերում թեմաների շուրջ:
Կայքերի գրանցումն ավարտվում նոյեմբերի 27-ին: Միջոցառման կազմակերպիչներն են SP Marketing Solutions, Orange Armenia ընկերությունները և Հայաստանի Ինտերնետ hանրության ՀԿ-ն։
