Գերմանացի ռեժիսոր Կիրիլ Տուշիի «Խոդորկովսկի» վավերագրական ֆիլմը կցուցադրվի Մոսկվայի միայն մեկ կինոթատրոնում, քանի որ մյուս բոլորը, չնայած նախնական համաձայնությանը, վերջին պահին հրաժարվել են ֆիլմի ցուցադրությունից:
«Մեկ ամիս առաջ Մոսկվայում մենք ունեինք 7 հարթակ, և գործնականում մեկ օրում բոլորը հրաժարվեցին ֆիլմից: Նրանք այն հանել են վարձույթից, և այսօրվա դրությամբ մենք Մոսկվայում ունենք միայն մեկ կինոթատրոն` «Էլդարը»»,- gazeta.ru-ին պատմել է Ռուսաստանում Kinoclub նախագծի պաշտոնական ներկայացուցիչ Օլգա Պապերնայան:
Նա ասել է, որ ցուցադրությունից առաջինը հրաժարվել է Москино կինոթատրոնների ցանցը, ընդ որում՝ շուկայում լուրեր են պտտվում, որ դա եղել է «զանգով»: Այնուհետև «շղթայական ռեակցիայով» հրաժարվել են նաև մյուսները:
Պապերնայան նշել է, որ իրավական առումով վարձույթից հրաժարվելու համար կինոթատրոնները ոչ մի հիմք չունեին, քանի որ ֆիլմի ցուցադրության համար իրենք իրավունք ստացել էին:
«Խոդորկովսկի» ֆիլմի պրեմիերան տեղի է ունեցել Բեռլինյան 61-րդ փառատոնի ժամանակ:
