Грузия Online-ի փոխանցմամբ՝ Վրաստանի նախկին նախագահ Էդուարդ Շևարդնաձեն վրացական «Ասավալ-դասավալի» թերթին տված հարցազրույցի ժամանակ բացառել է Վրաստանի նախագահ Միխեիլ Սաակաշվիլիի ու ընդդիմադիր միլիարդատեր Բիձինա Իվանիշվիլիի միջև հանդիպումների ու բանակցությունների անցկացման հնարավորությունը.
«Ոչինչ չի վկայում այդպիսի հանդիպումների անցկացման մասին։ Չնայած նախկին նախագահական ընտրությունների ժամանակ Սաակաշվիլին թեկնածուներից մեկին՝ Լևան Գաչեչիլաձեին, առաջարկել է հանդիպել ու բանակցել, սակայն այս դեպքում այդ պատմությունը չի կրկնվի։
Լևան Գաչեչիլաձեի դեպքն այլ հարց է։ Իվանիշվիլին հանդիսանում է իշխանության գալու իրական հավակնորդ և Սաակաշվիլիի մրցակից։ Սաակաշվիլին ցայժմ այդպիսի մրցակից չի ունեցել։ Գաչեչիլաձեն հաղթել էր Թբիլիսիում, մինչդեռ Իվանիշվիլիին հաղթելու է ողջ Վրաստանում։
Այնպես որ, ես բացառում եմ նրանց միջև բանակցությունները։ Սաակաշվիլին Գաչեչիլաձեին առաջարկել է գումար, իսկ ի՞նչ կարող է նա առաջարկել Իվանիշվիլիին»։
Հիշեցնենք, որ Forbes-ի տվյալներով՝ Իվանիշվիլիի կարողությունը գնահատվում է 5.5 միլիարդ դոլար։
