Սփրեդը կարագի անվան տակ վաճառելը սպառողներին մոլորեցնելու մի տեսակ է: «Առաջին լրատվական»-ի հետ զրույցում, անդրադառնալով կարագ-սփրեդ բացահայտված խախտումներին, նման տեսակետ հայտնեց Սպառողների միության նախագահ Արմեն Պողոսյանը: Նա տեղեկացրեց, որ յուրաքանչյուր ապրանքանիշի վրա հստակ պետք է ամրագրվի և հստակ պետք է տարբերակվի կարագը մյուս սննդատեսակներից, մասնավորապես՝ սփրեդից:
«Սփրեդն իր բաղադրությամբ կարող է պարունակել խառնուրդներ. տերմինը հենց դա էլ նշանակում է: Կարագը պետք է լինի կենդանական ծագման, իսկ եթե առկա են բուսական տարրեր, ապա արդեն այդ հումքը կարագ չէ, և չի կարելի կարագի անվան տակ վաճառել»,- նշեց Ա. Պողոսյանը` հավելելով, որ դա սպառողներին մոլորեցնելու տեսակ է:
Սպառողների միության նախագահը դրական գնահատեց խախտում իրականացրած ընկերություններին պատժելու Տնտեսական մրցակցության պաշտպանության հանձնաժողովի որոշումը, սակայն դեմ է բոլոր ընկերությունների նկատմամբ նույն տուգանքը կիրառելուն:
«Ես կատեգորիկ դեմ եմ բոլոր ընկերությունների նկատմամբ 3 մլն դրամի տուգանք կիրառելուն, որովհետև նույն չափով տուգանելը և՛ տրամաբանորեն, և՛ տնտեսական առումով ճիշտ չէ: Դրա հետևանքը լինում է այն, որ կան ձեռնարկություններ, որոնք ունեն տարբեր սեգմենտ, այսինքն` տարբեր տեսակարար կշիռ շուկայում»,- մեկնաբանեց Ա. Պողոսյանը` հավելելով, որ խոշոր ձեռնարկատերերի համար 3 մլն տուգանքը պարգև է, իսկ փոքր ընկերությունների համար դա նշանակում է սնանկացում: Նման նախադեպ արձանագրվել է ձու ատադրողների համակարգում: Ըստ Ա. Պողոսյանի`30-ն էին այն ձեռնարկությունները, որոնք խախտում էին կատարել: «Մեծ ձեռնարկությունները շուկայում 39% ունեին, իրենց համար տուգանքի չափը չնչին էր, մի քանիսը սնանկացան, իսկ մի քանիսն էլ, չունենալով ֆինանսական հզորություն, շրջանառու միջոցներ, կամ նվազեցրին իրենց արտադրանքի ծավալը կամ ընկան ֆինանսական բարդությունների մեջ»,- մեկնաբանեց Սպառողների միության նախագահը`ընդգծելով, որ արդյունքում պատիժն իր նպատակին չհասավ:
Նշենք, որ ՏՄՊՊՀ-ն կատարել էր հսկիչ գնումներ ու պարզել, որ կարագի անվան տակ սպառողներին վաճառվել է բուսասերուցքային սփրեդ, որը տեսքով գրեթե չի տարբերվում կարագից, բայց շատ ավելի էժան է (1 կգ-ը` մոտ 1000 դրամ): Այսօր Տնտեսական մրցակցության պաշտպանության հանձնաժողովի նիստում տուգանվեցին «Սթար Դիվայդ», «Ալեքս Գրիգ», «ՍԱՍ Գրուպ», «Ֆրեշ», «Նոր Զովք» և «Բիո-Ֆուդ», «Բրենդ Լիդեր», «Կարթել-Աննա», «Ֆելիքս Սարգ», «Արդիս» ՍՊԸ-ները ` յուրաքանչյուրը 3-ական միլիոն դրամով: