«Իրավունքի և ազատության կենտրոն» հասարակական կազմակերպության նախագահ Վարդան Հարությունյանը վստահ չէ, որ «Ժառանգություն» կուսակցության` լյուստրացիայի (գաղտնազերծման) մասին օրենքի նախագիծը հաջողությամբ կավարտվի, սակայն վստահ է, որ լյուստրացիան հասարակությանը շատ անհրաժեշտ է: Այս մասին նա ասաց այսօր կայացած մամուլի ասուլիսում:
««Ժառանգություն» կուսակցությունից շատ առաջ`դեռ իննսունականներին, լյուստրացիայի անհրաժեշտության մասին բարձրաձայնել եմ ես: Հետխորհրդային, ինչպես նաև Մերձբալթյան շատ երկրներ դա արել են և արել են բավական անցավ: Ինչո՞ւ չպետք է դա անենք նաև մենք:
Մենք չենք փորձում հեծանիվ հնարել: Երբեք ուշ չէ` մաքրվելու համար: Ազգային անվտանգության ծառայությունը ինչպե՞ս պետք է բացահայտի այն անձանց, որոնց ծառայություններից հիմա էլ օգտվում է: Մենք պե՞տք է դատապարտենք 37 թվականը, թե՞ ոչ»,- հռետորական հարց հնչեցրեց նա:
Նրա կարծիքով` հարց է, թե լյուստրացիան հասարակության շրջանում կունենա արձագանք, որն ակնկալում է «Ժառանգություն» կուսակցությունը:
«Այդ օրինագծին պետք է նայել մարդու, ոչ թե կագեբեեշնիկի տեսանկյունից»,- նշեց Վարդան Հարությունյանը` անդրադառնալով օրերս ՀԱԿ ներկայացուցիչ Գուրգեն Եղիազարյանի այն հայտարարությանը, թե լյուստրացիան կարող է հանգեցնել պետականության կորստի, և քայլը պետք է դիտարկել որպես դավաճանություն:
Ասուլիսին ներկա ՀՀԿ-ական պատգամավոր Հովհաննես Սահակյանն իր հերթին նկատեց, որ «Ժառանգության» նախաձեռնության պարագայում խոսքն ընդամենը հնչեղ մի նախաձեռնություն շրջանառության մեջ դնելու մասին է:
«Չեմ բացառում, որ «Ժառանգությունը» հետագայում ևս հնչեղ նախաձեռնություններով հանդես գա` հասարակության ուշադրությունն իր վրա սևեռելու համար: Ես` որպես ՀՀ քաղաքացի և ԱԺ պատգամավոր, կողմ եմ լյուստրացիայի գաղափարախոսությանը, սակայն տեխնիկական իրացումը թերի է:
Գաղտնազերծման գործընթացում պետք է հաշվի առնել մի շարք բաղադրիչներ: Ներկայացված օրենսդրական նախաձեռնությունում, սակայն, բազմաթիվ բացթողումներ և խնդիրներ կան: Այս գործընթացով մենք ի սկզբանե կասկածի տակ ենք դնում ազգային անվտանգության գործունեությունը:
Չեմ կարծում, որ ՀՀԿ-ն ուղղորդված անհանգստություն պետք է ունենա: Ընդդիմադիր դաշտի այն հայտարարությունները, թե լյուստրացիան կարող է հանգեցնել պետության կորստի, ևս PR քայլ է»,- նկատեց ՀՀԿ պատգամավորը:
