Եգիպտոսի զինված ուժերի Բարձրագույն խորհուրդը չի ընդունել կառավարության հրաժարականը, որը վճռել էր ինքնալուծարվել Թահրիր հրապարակում տեղի ունեցող անկարգությունների պատճառով:
Ինչպես հայտնում է РИА Новости՝ վկայակոչելով եգիպտական AL-Misr Al-youm թերթը, բանակացություններից հետո զինվորականներին հաջողվել է նախարարներին համոզել հրաժարական չտալ, հրաժարական տալու որոշումը պնդել է միայն մշակույթի նախարար Իմամ Աբու Գազին:
Հիշեցնենք, որ Կահիրեում բախումները սկսվել են նոյեմբերի 19-ին, երբ ոստիկանությունը ռետինե գնդակների և արցունքաբեր գազի օգնությամբ ցրել էր Թահրիր հրապարակում հավաքված գործադուլի մասնակիցներին: Ակցիայի մասնակիցները պահանջում էին իշխանություններից արագ կյանքի կոչել խոստացված բարեփոխումները, ինչպես նաև բողոքում էին Բարձրագույն խորհրդի ազդեցության ուժեղացման դեմ: Հաղորդվում է, որ բախումների մասնակիցները վանկարկում են Զինվորական խորհրդի հրաժարականը պահանջող կարգախոսներ:
France-Presse գործակալության հաղորդմամբ՝ բախումների ընթացքում զոհերի թիվը հասել է 13-ի: Հակակառավարական ցույցեր են տեղի ունեցել նաև Ալեքսանդրիայում, Ասվանում և Սուեզում:
Հոսնի Մուբարաքի իշխանության տապալումից հետո իշխանության եկած Զինվորական բարձրագույն խորհրդի ներկայացուցիչները բազմիցս հերքել էին իշխանությունը իրենց ձեռքում պահելու կասկածները, սակայն իշխանությունը քաղաքացիական կառավարության հանձնելու ժամկետը հստակեցված չէր:
Հիշեցնենք, որ նոյեմբերի 28-ին Եգիպտոսում տեղի են ունենալու խորհրդարանական ընտրություններ: Նախագահական ընտրությունները կայանալու են 2013 թվականի սկզբից ոչ ուշ:
