«Մոսկվա» կինոթատրոնի հարևանությամբ իրանական հիսուն հարկանի շինության կառուցման նախագիծ է ներկայացրել իրանական կիսապետական մի ընկերություն` Վիեննայում բնակվող մի պարսիկ ճարտարապետի նախագծով: Այսօր կայացած մամուլի ասուլիսում այս մասին հայտարարեց Հայաստանի ճարտարապետների միության նախագահ Մկրտիչ Մինասյանը:
Երևանի քաղաքապետարանի ավագանու քաղաքաշինության հանձնաժողովի նախագահ Հրաչ Պողոսյանն իր հերթին նկատեց, որ Երևանի գլխավոր ճարտարապետ Նարեկ Սարգսյանն իր հետ զրույցում ասել է, որ Նկարիչների միության տարածքում գտնվող տարածքն արդեն իսկ վաճառվել է և պատկանում է պարսկական ընկերությանը:
Հողատարածքի տրամադրումը տեղի է ունեցել 2009 թվականին` քաղաքի գլխավոր ճարտարապետ Սամվել Դանիելյանի գիտությամբ:
«Այն ժամանակ տվել են քսանհինգ հարկի կառուցման թույլտվություն: Բայց մենք կարծում ենք, որ թեկուզ քսանհինգ հարկանի շենք այդ տարածքում կառուցել չի կարելի: «Մոսկվա» կինոթատրոնի, Նկարիչների միության և Շառլ Ազնավուրի հրապարակին կից, բովանդակային առումով, այսպիսի շենքի կառուցումն անթույլատրելի է: Խնդիրը պետք է շտապ քննարկվի ճարտարապետների միությունում, եզրակացությունը ներկայացվի քաղաքապետարան և հարցին լուծում տրվի:
Նման շինություն կարող էր կառուցվել, ասենք, Երևանյան լճի ճանապարհին կամ մեկ այլ տեղ, բայց ոչ` Երևանի այդքան առանցքային կետում: Թեպետ դեռևս նախագիծը քաղաքապետարանում չի քննարկվել, սակայն ավելի լավ է` օր առաջ անհանգստանանք և բարձրաձայնենք այս մասին»,- նկատեց Պողոսյանը` միաժամանակ հավելելով, որ Երևանի գլխավոր ճարտարապետ Նարեկ Սարգսյանի հետ զրույցից ենթադրում է, որ քաղաքապետարանը հազիվ թե ցանկանա այդ տարածքում նմանօրինակ շենքի կառուցապատում թույլ տալ:
Ճարտարապետների միության նախագահ Մկրտիչ Մինասյանը նկատեց, որ պետք է անել ամեն բան, որպեսզի իրանական նախագիծը կյանքի չկոչվի` անգամ քսանհինգ հարկով:
«Այդ տարածքի հողը բավարար ռեսուրս չունի, բարձրահարկը իր հետ կտանի Փոքր Կետրոնի` մեր ունեցած ճարտարապետությունը, սեյսմիկ անվտանգությունը: Ինձ թվում է` քաղաքապետարանը` իր նոր կազմով, ընթացք չի տա նախագծին: Պարսկական կողմի առաջարկը չպետք է քննարկվի: Պարադոքսալ բան է կատարվում. Իրանը իր երկրի տարածքում պահպանում է հայկական հուշարձանները, սակայն կասկածելի նախագիծ է իրականացնում Երևանում: Ավելի լավ է` մեր ձայնը այժմ բարձրացնենք»,- գործընկերոջ միտքը կրկնեց նա` հավելելով, որ վերոնշյալ տարածքն իննսունականներին վաճառել է հենց Նկարիչների միությունը:
Նրա խոսքով` լավ կլիներ, որ տարածքում կրկին ցուցասրահներ և մշակութային այլ շինություններ կառուցվեին:
