Թուրքական Hürriyet Daily News թերթի փոխանցմամբ՝ 2007 թվականի հունվարի 19-ին Ստամբուլի Շիշլի թաղամասում տեղի ունեցած հայկական «Ակօս» թերթի գլխավոր խմբագիր Հրանտ Դինքի սպանության գործում ի հայտ են եկել ադրբեջանական ու չեչենական հետքեր։
Սպանության կազմակերպման մեջ մեղադրվող Յասին Հայալի հայրը՝ Բեհեթթին Հայալը, որը անվտանգության նկատառումներից ելնելով՝ հրաժարվել էր իր նախնական ցուցմունքներից, այնուամենայնիվ, նոր մանրամասներ է հաղորդել Դինքի սպանության հետ կապված։
Նա հայտարարել է, որ իր որդին՝ Յասին Հայալը, մանրադրամի դեր է կատարել այդ սպանության հարցում. «Իրական հանցագործներին պետք է հայտնաբերել։ Դինքի սպանությունից քիչ առաջ իմ որդին անսպասելիորեն մեկնել է Ադրբեջան, ընդ որում՝ չունենալով ո՛չ անձնագիր, ո՛չ էլ գումար։
Որդուս այս այցի մասին չի բարձրաձայնվել, սակայն դա կարող է հաստատել Էրհան Թունջելը (Դինքի սպանության գծով անցնող մեկ այլ կասկածյալ)։ Բացի այդ, որդիս Թունջելի միջնորդությամբ Տրապիզոնի նահանգում գտնվող Աքչաաբաթի շքեղ հյուրանոցում հանդիպում է ունեցել ոմն չեչեն բարձրաստիճան հրամանատարի հետ։
Այս այցերը շատ կարևոր են Դինքի սպանության գործում, դրա հետ կապված՝ անհրաժեշտ է հավելյալ հետաքննություն անցկացնել։ Ես չէի ստում, երբ ասում էի, որ իմ որդուն օգտագործել են։ Նրան կարող են դատապարտել ցմահ ազատազրկման, իսկ Թունջելին հնարավոր է՝ բաց թողնեն։ Ես խորապես ցնցված եմ Դինքի սպանությունից։ Ես անգամ քաջություն չունեմ՝ մոտենալու Հրանտ Դինքի այրուն՝ Ռաքել Դինքին»։
Հիշեցնենք, որ հուլիսի 25-ին Ստամբուլի 2-րդ անչափահասների ծանր հանցագործությունների դատարանն Օգյուն Սամասթին «կանխամտածված սպանություն իրականացնելու» և «ապօրինի զենք կրելու» համար դատապարտեց 22 տարի 10 ամիս ազատազրկման։
Ի դեպ, ավելի վաղ թուրք ազգայնական Յասին Հայալը խոստովանել է, որ ինքն է հրահրել Հրանտ Դինքի սպանությունը Օգյուն Սամասթի կողմից` նրան տալով զենք և գումար: Ներկայումս Յասին Հայալն ու Էրհան Թունջելը ներառված են նաև «Էրգենեկոն» ահաբեկչական կազմակերպության գործում. նրանք մեղադրվում են ուժի ու բռնության գործադրմամբ Թուրքիայի Հանրապետության Սահմանադրությամբ նախատեսված կարգի տապալման փորձ ձեռնարկելու մեջ, ինչի համար նրանց սպառնում է ցմահ ազատազրկում։