Եգիպտոսի մայրաքաղաք Կահիրեում` Թահրիր հրապարակում, տեղի ունեցած բախումների ժամանակ զոհերի թիվը հասել է 12-ի: Ինչպես հաղորդում է Reuters գործակալությունը` վկայակոչելով Եգիպտոսի առողջապահության և ժողովրդագրության նախարարությանը, վիրավորների թիվը հասել է 1700-ի: Նրանց մեծ մասը տեղափոխվել է հիվանդանոց:
Al Jazeera հեռուստաալիքի հաղորդմամբ` ռազմական բախումները մայրաքաղաքից տեղափոխվել են Եգիպտոսի այլ քաղաքներ: Շուրջ 4000 ցուցարարներ փողոց են դուրս եկել Ալ-Մահալա քաղաքում, որը հայտնի է իր ուժեղ աշխատավորական շարժմամբ: Ալեքսանդրիայում մարդիկ փորձել է գրավել ոստիկանական բաժանմունքը: Ցույցեր են տեղի ունենում նաև Մանսուրում, Սուեզում և այլ քաղաքներում:
«Մուսուլման եղբայրներ» շարժումը, որը ցույցի գլխավոր կազմակերպիչն է, դատապարտել է ցույցի ցրումը` նշելով որ դա հիշեցնում է Հոսնի Մուբարաքի ժամանակները:
Եգիպտոսի զինված ուժերի Բարձրագույն խորհուրդը հայտարարել է, որ չի պատրաստվում ձգձգել երկրում անցումային շրջանը, և խորհրդարանական ընտրությունները տեղի կունենան նախատեսված օրը` նոյեմբերի 28-ին: Կիրակի երեկոյան խորհրդի տարածած հաղորդագրության մեջ ասվում է, որ զինվորականները ոչ ոքի թույլ չեն տա խանթարել երկրում ժողովրդավարական բարեփոխումների գործընթացը:
Իր կոմյունիկեում Բարձրագույն խորհուրդը ափսոսանք է հայտնել տեղի ունեցող բախումների վերաբերյալ և կոչ արել բոլոր քաղաքական կուսակցություններին նպաստել երկրի կայունացմանը:
Բանակի ներկայացուցիչները նաև հայտնել են, որ Իսամ Շարաֆի կառավարությանը հանձնարարվել է «ամենակարճ ժամկետում ուսումնասիրել այն հանգամանքները, որոնք հանգեցրել են Թահրիրում ցավալի հետևանքների, և անմիջապես դատարան հանձնել մեղավորներին»։
Հիշեցնենք, բախումները սկսվել են նոյեմբերի 19-ին, երբ ոստիկանությունը ռետինե գնդակների և արցունքաբեր գազի օգնությամբ ցրեց Թահրիր հրապարակում հավաքված գործադուլի մասնակիցներին: Ակցիայի մասնակիցները պահանջում էին իշխանություններից արագ կյանքի կոչել խոստացված բարեփոխումները, ինչպես նաև բողոքում էին Բարձրագույն խորհրդի ազդեցության ուժեղացման դեմ: Հաղորդվում է, որ բախումների մասնակիցները վանկարկում են Զինվորական խորհրդի հրաժարականը պահանջող կարգախոսներ:
