Հայաստանում իրավունքի խախտումը իրականացվում է պատվերի հիման վրա: «Առաջին լրատվական»-ի հետ զրույցում նման տեսակետ հայտնեց փաստաբան Արտակ Զեյնալյանը`մեկնաբանելով, թե ինչու պատասխանատվության չեն ենթարկվում խախտում իրականացրած դատավորները Հայաստանում:
Օրերս Մարդու իրավունքների եվրոպական դատարանը թվով երրորդ դատական վճիռն է կայացրել Հայաստանի Հանրապետության դեմ`կառավարությանը պարտավորեցնելով վճարել18 հազար 500 եվրոյին համարժեք փոխհատուցում պետության կարիքներին զոհ դարձած ևս մեկ ընտանիքի:
Արտակ Զեյնալյանն ասաց, որ մի դեպք է եղել, երբ Եվրադատարանի վճռից հետո կարգապահական պատասխանատվության է ենթարկվել
Միշա Հարությունյանի գործով Սյունիքի ընդհանուր իրավասության առաջին ատյանի դատարանի դատավորը. նա մեկ տարի շարունակ պակաս աշխատավարձ է ստացել:
«Որևէ այլ պաշտոնատար անձ եվրոպական դատարանի վճիռների հիման վրա չի ենթարկվել պատասխանատվության»,- տեղեկացրեց փաստաբանը`հավելելով, թե աբսուրդ է, որ առաջին ատյանի դատարանի դատավորը մեղավոր է ճանաչվել, իսկ մյուս ատյանների դատավորները`ոչ: Ըստ նրա` եթե մեղավոր է առաջին ատյանի դատավորը, մեղավոր են նաև հաջորդ ատյանների դատավորները ևս, որովհետև այդ ակտը ենթարկվել է փոփոխությունների իրավաչափության տեսակետից վերադաս դատարանների կողմից, և ըստ էության մեղավորները բոլոր դատավորներն են:
Արտակ Զեյնալյանը նաև մանրամասնեց, որ առաջին ատյանի դատարանից հետո մարդը չի կարող դիմել Եվրոպական դատարան, քանի որ Եվրոպական դատարան դիմելու համար պետք է սպառել ներպետական պաշտպանության միջոցները. բոլոր ատյաններով պետք է անցնել:
Ըստ փաստաբանի` որևէ մեկի դեմ որևէ ռեգրեսիվ հայց չի ներկայացվել:
Այն հարցին, թե Հայաստանում ինչու են խուսափում ռեգրեսիվ հայց կիրառելուց, պատճառաբանեց, որ իրավունքի խախտումը իրականացվել է պատվերի հիման վրա, այսինքն` դատավորը կատարել է պատվեր:
Խոսելով այլ երկրներում նախադեպերից`նշեց, որ Ադրբեջանում կա այդպիսի իրավակարգավորում, երբ Եվրոպական դատարանի վճռից հետո պատասխանատվության պետք է ենթարկվեն այն դատավորները, ովքեր իրականացրել են դատական ակտը: «Իմ խորին համոզմամբ՝ ողջ համակարգն է մեղավոր, երբ սխալներ են լինում դատական համակարգում, ոչ թե կոնկրետ դատավորը: Իմ կարծիքով՝ դատավորները չպետք է պատասխանատվության ենթարկվեն»,- կարծում է փաստաբան Արտակ Զեյնալյանը: