Եգիպտոսը կարող է վերցնել Արժույթի միջազգային հիմնադրամի առաջարկած 3,2 միլիարդ դոլար գումարը, որից նախկինում հրաժարվել էր: Այդ գումարով նա պատրաստվում է հաղթահարել երկրի տնտեսական և ֆինանսական խնդիրները:
Ինչպես հաղորդում է РИА Новости-ն, այս մասին հայտնել են եգիպտական ԶԼՄ-ները, հղում կատարելով Եգիպտոսի ֆինանսների նախարար Հազեմ Ալ-Բեբլաուին: Նրա խոսքերով, այդ որոշումը կարող է ընդունվել «մոտ ժամանակներս»:
Դեռ հոկտեմբերի սկզբին Ալ-Բեբլաուին հայտարարել էր, որ վերանայում է ԱՄՀ-ից վարկ ստանալու հնարավորությունը: Նոյեմբերի սկզբին Եգիպտոս էր ժամանել ԱՄՀ-ի հանձնաժողովը` երկրի ֆինանսատնտեսական իրավիճակը գնահատելու համար:
Ընդ որում՝ Եգիպտոսը համաձայնագիր է ստորագրել Արժույթի արաբական հիմնադրամի հետ վարկի առաջին տրանշը ստանալու համար (200 միլիոն դոլար): Վարկի ընդհանուր գումարը, որը կարող է ԱԱՀ կողմից տրամադրվել Եգիպտոսին, կազմելու է 470 միլիոն դոլար: Եգիպտոսի նախկին նախագահ Հոսնի Մուբարաքի վարչակարգի տապալումից հետո Եգիպտոսը բախվել է բյուջեի աճող պակասորդի խնդրին: Իրավիճակը սրվում է անվտանգության համակարգի փլուզման, քաղաքական մթնոլորտում անորոշության և տնտեսության անկման պատճառով:
Հիշեցնենք, որ Եգիպտոսում առաջին ազատ խորհրդարանական ընտրությունները տեղի են ունենալու նոյեմբերի 28-ին, սակայն երկրի իշխանությունը զինվորականների ձեռքում պահպանվելու է մինչև նախագահական ընտրությունները, որի ժամկետը դեռ որոշված չէ:
