ՀՀ նախագահի մամլո գրասենյակից «Առաջին լրատվական»-ին տեղեկացնում են, որ ՀՀ նախագահ Սերժ Սարգսյանն այսօր «Արմենիա-Մարիոթ» հյուրանոցում մասնակցել է բուլղարացի ռեժիսոր Ցվետանա Պասկալևայի «Ղարաբաղի վերքերը» ֆիլմաշարի տեսասկավառակների շնորհանդեսին:
Տեսասկավառակները բաղկացած են արցախյան ազատամարտի վերաբերյալ ռեժիսորի 7 վավերագրական ֆիլմերից, որոնք ձայնագրվել են 6 լեզվով՝ հայերեն, ռուսերեն, անգլերեն, ֆրանսերեն, իսպաներեն և բուլղարերեն:
Ց. Պասկալևան շնորհակալություն է հայտնել Ս. Սարգսյանին՝ այս ծրագրին աջակցելու համար:
Նրա խոսքով` դրանց շնորհիվ հնարավոր կլինի ճիշտ պատկերացում կազմել ղարաբաղյան խնդրի մասին:
Ց. Պասկալևան «Ղարաբաղի վերքերը» նախագծի տեսասկավառակների մայր օրինակները միջոցառման ժամանակ հանձնել է Ս. Սարգսյանին:
Հանրապետության ղեկավարի խոսքով` առանց ռեժիսորի աշխատանքի, ամբղջական պատկերացում չէր լինի ղարաբաղյան հակամարտության մասին:
Նախագահը շնորհակալություն է հայտնել նրան, ով իր երիտասարդ կյանքի մի մեծ հատված եղել է հայ զինվորի, երկրապահի, հայոց հողի պաշտպանի կողքին և հավերժացրել այն մարդկանց գործունեությունը, ովքեր կարողացել են պատվով պաշտպանել իրենց հայրենի հողը:
Ս. Սարգսյանի խոսքով` արված աշխատանքը և ցուցաբերված աջակցությունը հարգանքի տուրք է բոլոր այն մարդկանց, ովքեր մասնակցել են այդ մեծ գործին:
Նախագահն ընդգծել է, որ այսօր ոչ պակաս կարևոր է շարունակել ղարաբաղցիների պայքարի ճշմարտացիությունը աշխարհին հասցնելու գործը:
