Իրանական Iran News լրատվական գործակալության փոխանցմամբ՝ Շվեյցարիան խստացրել է Իրանի նկատմամբ պատժամիջոցները։ Այս մասին հայտնում է Շվեյցարիայի հեռագրային գործակալությունը (ATS) ՝ վկայակոչելով Շվեյցարիայի տնտեսության պետական քարտուղարությանը (SECO)։
Շվեյցարիայի տնտեսական պատժամիջոցների թվում ընդգրկված սուբյեկտների ցանկում հայտնվել են 111 ընկերություններ և 5 մարդ, այդ թվում՝ նաև Իրանի ատոմային էներգիայի կազմակերպության մի քանի ներկայացուցիչ։
Ընդհանուր առմամբ, Շվեյցարիայի «սև» ցուցակում ընդգրկված են 250 իրանական ընկերություններ ու ֆիզիկական անձինք։ Այդ պատժամիջոցներով նախատեսվում է արգելք դնել երկակի նշանակության ապրանքների առաքումների ու գնման վրա։
Դա նաև վերաբերում է միջուկային զենքի տարածման տեսանկյունից ռիսկ պարունակող սարքավորումներին, տեխնոլոգիաներին ու ծրագրային ապահովմանը։
Բացի այդ, նախատեսվում է սառեցնել ֆիզիկական և իրավաբանական անձանց ունեցվածքը։
