Standard & Poor’s միջազգային վարկանիշային գործակալությունը մեկ շաբաթվա մեջ արդեն երկրորդ սխալն է թույլ տվել: Ինչպես հաղորդում է gazeta.ru-ն, այժմ գործակալության փորձագետները սխալ են ներկայացրել Բրազիլիայի վարկային վարկանիշը:
Ավելի վաղ S&P-ն սխալմամբ իջեցրել էր Ֆրանսիայի վարկանիշը, որից հետո տարածած հաղորդագրության մեջ հայտարարել էր, թե սխալը տեղի է ունեցել տեխնիկական պատճառներով, և որ այդ առթիվ սեփական հետաքննություն է անցկացնում:
Այժմ S&P-ն երկրորդ սխալն է գործում Բրազիլիայի վարկանիշի դեպքում: Սկզբնապես կազմակերպության կայքում տեղեկություն էր հայտնվել, որ երկրի վարկային վարկանիշը բարձրացվել է «BBB-» մակարդակի վրա, սակայն հետո գործակալությունն ուղղել էր սխալը և հայտնել, որ Բրազիլիայի վարկանիշը արդեն այդ մակարդակի վրա էր և այժմ բարձրացվում է մինչև «BBB»: S&P-ն հայտնել է, որ սխալը եղել է միայն վերնագրում, իսկ տեքստում տեղադրված է եղել ճիշտ ինֆորմացիա:
Ֆրանսիայի վարկային վարկանիշը սխալմամբ իջեցնելուց հետո Եվրահանձնաժողովը հայտարարեց, որ պատրաստվում է խստացնել վարկային գործակալությունների գործունեության պայմանները և հնարավորություն տալ ներդրողներին նրանց դատի տալ:
