Սիրիայի նախագահ Բաշար Ալ-Ասադի հորեղբայրը՝ սիրիական բանակի նախկին զորահրամանատար Ռիֆաաթ Ալ-Ասադը, կոչ է արել նրան հրաժարական տալ: Այնուամենայնիվ, ինչպես հաղորդում է Reuters գործակալությունը, Ռիֆաաթը կարծում է, որ իր եղբորորդին մեղավոր չէ ներկա քաղաքական ճգնաժամի համար:
Ռիֆաաթ Ալ-Ասադի խոսքերով` Սիրիայի նախագահի հրաժարականն անհրաժեշտ է քաղաքացիական պատերազմը կանխելու համար, քանի որ ներկա քաղաքական վարչակարգի կողմնակիցների և հակառակորդների միջև բախումների 6 ամիսներն արդեն հանգեցրել են մեծ թվով զոհերի:
«Անհրաժեշտ է, որպեսզի նա հեռանա, սակայն երկիրը լքելու կարիք չկա: Նա պատասխանատվություն չի կրում (քաղաքական ճգնաժամի համար.- 1in.am)։ Պատմականորեն այնպես է դասավորվել, որ այս ժամանակաշրջանում շատ բաներ են կուտակվել: Ես կցանկանայի, որպեսզի նա ինքը զգար, որ պետք է հրաժարական տա»,- հայտարարել է Ռիֆաաթ Ալ-Ասադը:
Շաբաթվա սկիզբին Ռիֆաաթ Ալ-Ասադը նմանատիպ ևս մեկ կոչ էր արել ֆրանսիական Figaro թրթին տված հարցազրույցում:
Ռիֆաաթ Ալ-Ասադը Հաֆեզ Ասադի կառավարման տարիներին եղել է Սիրիայի բանակի հրամանատարներից մեկը: Նրա գլխավորությամբ է ճնշվել 1982 թ. Համայի ապստամբությունը: Հենց այդ քաղաքն էլ այժմ ակտիվորեն հանդես է գալիս Բաշար Ալ-Ասադի դեմ:
1980-ական թթ. նա փորձեց իր ձեռքը վերցնել իշխանությունը, սակայն դա նրան չհաջողվեց։ Այժմ Ռիֆաաթ Ալ-Ասադը ապրում է Սիրիայի սահմաններից դուրս:
