KM.RU-ի փոխանցմամբ՝ Իրանը հերքել է վերջին շրջանում ԶԼՄ-ների կողմից շրջանառության մեջ դրված այն լուրը, թե բանակցություններ է անցկացրել սիրիական ընդդիմության ներկայացուցիչների հետ։ Այդպիսի հերքմամբ հանդես է եկել Դամասկոսում գտնվող Իրանի դեսպանատունը:
Վերջինս ընդգծել է, որ Թեհրանի ներկայացուցիչների և սիրիական ընդդիմության ներկայացուցիչների հանդիպումը հնարավոր է միայն կառավարության թույլտվության պարագայում։
Հիշեցնենք, որ օրեր առաջ բրիտանական The Daily Telegraph թերթը գրել է, որ Սիրիայի նախագահ Բաշար Ալ-Ասադի ռեժիմի մերձակա դաշնակից Իրանը մի շարք բանակցություններ է վարել սիրիական ընդդիմության ներկայացուցիչների հետ։
Բրիտանական թերթի տվյալներով՝ իրանցի պաշտոնատար անձինք հանդիպումներ են ունեցել սիրիական չափավոր ընդդիմության ներկայացուցիչների առաջնորդ Խայթամ Մանի, ինչպես նաև մեկ այլ ընդդիմադիր խմբի՝ Ազգային կոորդինացիոն կոմիտեի անդամների հետ։