Հագուստ արտադրող Benetton ընկերությունը հետ է կանչել Հռոմի պապ Բենեդիկտոս 16-րդի և եգիպտացի իմամի համբույրի նկարով իր գովազդը:
Ինչպես հաղորդում է Associated Press-ը, համբույրն իրական չէ, այլ արված է ֆոտոշոփի միջոցով: Գովազդում պատկերված եգիպտացի իմամը ներկա է եղել միջկրոնական երկխոսության ծրագրին, որին մասնակցել է նաև Վատիկանը: Սակայն Հռոմի պապի կողմից Եգիպտոսում քրիստոնյա ղպտիների վրա հարձակման երևույթը քննադատելուց հետո մուսուլման իմամը հրաժարվել է կաթոլիկ եկեղեցու հետ հետագա կապերից:
Վատիկանի ներկայացուցիչը գովազդային պաստառը համարել է անընդունելի:
Benetton-ը, որը հայտնի է իր ցնցող գովազդներով, բացատրել է, որ կրոնական և քաղաքական գործիչների համբույրի իմաստը հանուն բարության ատելությունը հաղթահարելն է:
Մյուս գովազդային պաստառներում «համբուրվում են», օրինակ, Բարաք Օբաման և Ուգո Չավեսը, Կիմ Չեն Իրը և Հարավային Կորեայի նախագահը, Անգելա Մերկելը և Նիկոլա Սարկոզին, Մահմուդ Աբբասը և Բենյամին Նեթանյահուն:
