ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ Կահիրեի համալսարանի Հայագիտական ուսումնասիրությունների կենտրոնում նոյեմբերի 14-15-ը տեղի է ունեցել «Հայաստանն արաբական և արևմտյան աղբյուրներում» թեմայով 4-րդ միջազգային գիտաժողովը` նվիրված ՀՀ անկախության 20-ամյակին:
Այն կազմակերպվել էր Կահիրեի համալսարանի ռեկտոր Հուսամ Քամելի հովանավորությամբ և Եգիպտոսում ՀՀ դեսպանության աջակցությամբ:
Բացման հանդիսավոր արարողությանը ներկա են եղել ԵԱՀ ԱԳ նախարարի տեղակալ Վահիդ Գալալը, անվանի եգիպտացի մտավորականներ, Կահիրեի և այլ համալսարանների պրոֆեսորներ, ուսանողներ, ինչպես նաև եգիպտահայ համայնքի ներկայացուցիչներ:
Գիտաժողովի մասնակիցներին ողջունել են Եգիպտոսում ՀՀ դեսպան Արմեն Մելքոնյանը, Կահիրեի համալսարանի բանասիրության ֆակուլտետի դեկան Մոթազ Սայիդ Աբդալլահը և կենտրոնի տնօրեն Զեյնաբ Աբու Սիննան, որոնք բարձր են գնահատել կենտրոնի դերը հայ-արաբական գիտակրթական և մշակութային համագործակցության զարգացման գործում:
ՀՀ դեսպանն ընդգծել է, որ գիտաժողովի ծրագրում ավելի քան 20 եգիպտացի գիտնականների զեկուցումների առկայությունն այն հանգամանքի խոսուն վկայությունն է, որ կենտրոնին հաջողվել է իր գործունեության մի քանի տարում կտրուկ ավելացնել հետաքրքրությունը հայագիտության նկատմամբ Եգիպտոսի գիտական շրջանակներում:
Երկօրյա գիտաժողովին զեկուցումներով հանդես են եկել նաև Հայաստանից, Սիրիայից և Լիբանանից ժամանած մասնագետներ:
Հինգ նիստերից մեկն ամբողջությամբ նվիրված է եղել Օսմանյան կայսրությունում Հայկական հարցին:
Հատկապես մեծ հետաքրքրություն են առաջացրել Մուհամմադ Ռեֆաթ ալ-Իմամի «Հայկական հարցի նկարագրությունը ժամանակակից արաբական գրականությունում (1878-1923թթ.)», Ալի Սաբեթ Սաբրիի «1894-1896թթ հայկական ջարդերը ակադեմիական տեսանկյունից», Նարինե Հարությունյանի (Հայաստան) «1894-1896թթ հայկական ջարդերի արտացոլումը Կահիրեի «Ալ-Մուշիր» ամսագրում», Նորա Արիսյանի (Սիրիա) «Հայերը սիրիական մամուլում» զեկուցումները:
Գիտաժողովի նյութերն առանձին գրքով կտպագրվեն:
