Գոբի անապատում առեղծվածային ցիկլոպյան օբյեկտների մի մասը, որոնք հայտնաբերվել էին Google արբանյակային լուսանկարների շնորհիվ և ցնցել համացանցային հասարակությանը, արդեն բացահայտվել են, սակայն նրանց ծագումն ու մի քանի հսկայական կառույցների նշանակությունը դեռ անհայտ են մնում: Միաժամանակ, օգտատերերի կողմից արված հետազոտությունների արդյունքում անհայտ կառույցներ են հայտնաբերվել նաև Չինաստանի այլ տարածքներում:
Wired.com կայքը հայտնում է, որ դեռ հնարավոր չէ պատասխանել այն հարցերին, թե ինչ են իրենցից ներկայացնում անապատի կենտրոնում կանաչ ուղղանկյունների մեծ կուտակումները: Հայտնի չէ նաև, թե ինչի համար են նախատեսված անբնական երկնագույն հսկայական խորանարդները:
Անհասկանալի են նաև իրար մեջ խաչվող հսկայական գծերը, խորանադները, որոնց կողքին առկա են այրված ռազմական տեխնիկայի մնացորդներ, ինչպես նաև վիթխարի վանդակները: Փորձագետները չեն բացառում, որ դրանք կարող են լինել տարբեր բնագավառներում գործածվող ազգային տնտեսության տարբեր օբյեկտներ:
Իսկ բլոգերները ենթադրում են, որ դրանք հնարավոր է ունեն ռազմական նշանակություն, իսկ բրիտանացի փորձագետ Թիմ Ռիպլին այդ կառույցները համեմատել է ԱՄՆ Նևադա նահանգում տեղակայված Պենտագոնի «51 գոտի» գաղտնի հենակետի հետ: Հնչել են նաև այլ տարբերակներ, այն որ չինացիները անապատում կառուցում են ամերիկյան քաղաքների մեծամասշտաբ «քարտեզ», որպեսզի վերամշակեն իրենց վրա հնարավոր հարձակումները, ինչպես նաև օբյեկտները կարող են ծառայել չինական արբանյակ-լրտեսների համապատասխանեցման համար:
Ինչպես գրում է բրիտանական The Guardian թերթը, նման հետազոտության դեպքում ակնհայտ է, որ նկարների մեծ մասում ոչ մի արտառոց բան չկա. դրանք արդյունաբերական օբյեկտներ են և ռազմական ուսուցման վայրեր, որոնք չի թաքցնում նույնիսկ Չինաստանի Ժողովրդական Հանրապետությունը:
Երկնագույն հսկայական ուղղանկյուն կառույցը Լոպ Նուր լճում կալիում արտադրող աշխարհում խոշորագույն գործարանն է: Մյուս նկարները գտնվում են այս շրջանի մոտ, որտեղ տեղակայված է Լոպ Նուրի հայտնի ռազմական ուսուցման կենտրոնը: Հենց այստեղ էր նախկինում Չինաստանը անցկացնում միջուկային զենքի ստորգետնյա փորձարկումներ: Այս տարածքը մինչև հիմա փակ ռազմական գոտի է: Ընդ որում չինացիները չեն հերքում և չեն էլ թաքցնում այս ռազմական ուսուցանման կենտրոնի առկայությունը:
Իսկ մի քանի այլ նկարներից կարելի է ենթադրել, որ դրանք կարող են լինել նաև քամու միջոցով աշխատող էլեկտրասարքեր: Ինչպես հայտնի է, Չինաստանը վերջին տարիներին քամու էներգետիկայի բնագավառում առաջատար դիրք ունի:
