Կալիֆոռնիայի UC Berkeley համալսարանի ղեկավարությունը հայտնել է, որ բիզնես դպրոցի տարածքում անհայտ անձը կրակ է բացել: Ինչպես հաղորդում է Associated Press-ը, մեկ մարդ վիրավորվել է:
Համալսարանի ներկայացուցիչը գործակալությանը հայտնել է, որ դեպքը տեղի է ունեցել տեղի ժամանակով 15:00-ի սահմաններում: Համալսարանի ղեկավարության տարածած հաղորդագրության մեջ նշվում է, որ համալսարանի անվտանգության աշխատակիցները նկատել են զենքով տղամարդուն և այդ մասին հայտնել ոստիկանությանը: Տեսնելով ոստիկաններին՝ տղամարդը հանել է ատրճանակը, սակայն ոստիկանները կրակել են նրա վրա: Հաղորդագրության մեջ չի նշվում կասկածյալի անձը, և թե արդյո՞ք նա վիրավորվել է փոխհրաձգության ժամանակ:
Գործակալությունը նշում է, որ կրակողը եղել է ուսանողների «Գրավեք Ուոլ Սթրիթը» ակցիայի ճամբարից մոտ 800 մետր հեռավորության վրա: Նշվում է, որ հրապարակում հազարավոր ուսանողներ են հավաքվել, որոնք փորձել են այնտեղ ճամբար դնել և միանալ սոցիալական բողոքի ցույցերին:
